Шүүхийн шийдвэр гүйцэтгэх ерөнхий газрын (ШШГЕГ) удирдлагууд хэвлэлийн хурал зарлан, тус байгууллагын өдөр тутмын хэвийн үйл ажиллагаанд улс төрийн сонирхлоор нөлөөлөх гэсэн бэрхшээлүүд тулгарч байгааг ил тод зарлалаа. ШШГЕГ-ын дарга А.Намсаманд салбарын яамны зүгээс ирж буй дарамт шахалт, хууль зөрчсөн үйлдлүүдийн талаар олон нийтэд мэдээлэл өгсөн юм.
Түүний мэдээлснээр, Хууль зүй, дотоод хэргийн сайдын шууд томилдог тус газрын тэргүүн дэд дарга нь Төрийн болон албаны нууцын тухай хуулийг удаа дараа зөрчин байгууллагын аюулгүй байдалд эрсдэл учруулсан тул хуулийн байгууллагад шалгуулахаар шийдвэрлэжээ. Түүнчлэн ХЗДХ-ийн сайд С.Амарсайхан шаардлага хангаагүй хүмүүсийг албан тушаалд томилуулахаар байнга шахаж, хэрэв шаардлагыг нь биелүүлэхгүй бол сүрдүүлж, доромжилдог байсан хэмээн мэдэгдсэн юм.
Шахалтаар хийгдсэн томилгоонууд:
- Жолоочийнх нь эхнэр: “Төр хурх” сувиллын газрын даргаар томилогдсон.
- Жолоочийнх нь төрсөн дүү: Архангай аймгийн Шийдвэр гүйцэтгэх газрын даргаар томилогдсон.
- Яамны газрын даргын дүү: Хяналт шалгалтын газрын дарга Д.Дамдинцэрэнгийн төрсөн дүүг даргаар томилсон.
Иргэний шийдвэр гүйцэтгэх ажиллагааны хүрээнд улс төр, бизнес бүлэглэлийн өр төлбөртэй холбоотой хэргүүдийг яамны дарга нар өрөөндөө дуудаж, ажиллагааг гацаах замаар шууд удирддаг болохыг А.Намсаманд онцлов. Тэр дундаа ХЗДХ-ийн сайдын хамаарал бүхий компания 4 сая гаруй ам.доллар, засаг дахь өөр нэгэн сайдын аж ахуйн нэгж 53 тэрбум төгрөгийн өр төлбөртэй байгаа бөгөөд уг хэргүүдийг шийдвэрлэх гэхэд ажлаас нь хална хэмээн сүрдүүлсэн байна. Тэрээр аль нэг сайдын хууль бус шийдвэрийг дагах бус зөвхөн хуулиар хүлээсэн тангарагтаа үнэнч байна гэдгээ төгсгөлд нь мэдэгдсэн юм.
