Хөгжлийн бэрхшээлийг сөрөн зогсож, өөрийн бодит амьдралын түүхээр дамжуулан итгэл найдвар, тэсвэр хатуужил, хайр болон хүсэл мөрөөдлийн үнэ цэнийг өгүүлсэн “Аз жаргалд урьсан хайр” анхны номоо номын санч Э.Азжаргал уншигчдын хүртээл болголоо.
Э.Азжаргал нь 14 насандаа анх тархинд нь цус харваж, улмаар 17 насандаа дахин харвалтад өртсөний улмаас хөдөлмөрийн чадварынхаа 90 хувийг алдаж байжээ. Гэсэн хэдий ч тэрээр шантралгүйгээр олон жилийн хичээл зүтгэл, сэргээн засах эмчилгээний үр дүнд:
- Хэвтрийн байдлаас гарч, эхлээд тэргэнцэр, дараа нь таяг хэрэглэн алхаж сурсан.
- Бие даан алхаж, ярьж чаддаг болсноор зогсохгүй Соёл урлагийн их сургуулийг (СУИС) номын санч мэргэжлээр амжилттай төгссөн.
“Найдвар” номын сан ба нийгмийн үйлс
Тэрээр номыг өөрийн хамгийн дотнын нөхөр гэж үзэн тасралтгүй суралцсаар 2024 онд Увс аймгийн Тариалан суманд Монголын анхны хувийн “Найдвар” номын санг байгуулжээ. Өдгөө төрөлх сумынхаа Соёлын төвийн номын санчаар ажиллаж, хүүхэд, залууст уншлагын соёлыг түгээн дэлгэрүүлж байна.
“Миний ‘Аз жаргалд урьсан хайр’ номын нээлтэд хүрэлцэн ирж, баярыг минь хуваалцсан аав, ээж, ах, эгч, дүү нар, төрөл төрөгсөд, найз нөхөд, номын сангийн хамт олондоо чин сэтгэлийн талархал илэрхийлье. Та бүхний халуун сэтгэл, урмын үг миний итгэл найдвар, урам зоригийн эх булаг болсоор ирсэн. Цаашид ч илүү ихийг хийж бүтээхийн төлөө хичээнэ.” — Зохиолч, номын санч Э.Азжаргал
