Монгол Улсын Их Хурлын дарга Д.Амарбаясгалангийн урилгаар Бүгд Найрамдах Солонгос Улсын Үндэсний Ассамблейн дарга У Вон Шиг 2025 оны 4-р сарын 26-наас 30-ны хооронд Монгол Улсад албан ёсоор айлчилна. Энэ нь хоёр орны парламент хоорондын харилцааг шинэ шатанд гаргах чухал айлчлал болж байна.
12 жилийн дараах анхны парламентын дээд түвшний айлчлал
Энэ удаагийн айлчлал нь БНСУ-ын Үндэсний Ассамблейн даргын Монгол Улсад хийж буй сүүлийн 12 жилийн хугацаан дахь анхны албан ёсны айлчлал юм. Айлчлалын үеэр хоёр орны парламентын харилцаа, дээд түвшний яриа хэлэлцээний давтамжийг тогтворжуулах, харилцан ойлголцлыг гүнзгийрүүлэх, хамтын ажиллагааг өргөжүүлэх зэрэг асуудлыг хөндөнө.
“Стратегийн түншлэл”-ийг бэхжүүлэх нь энэ удаагийн айлчлалын нэг гол зорилго бөгөөд хоёр улсын хамтын ажиллагааг парламентын хүрээнээс гадна бүс нутгийн болон олон улсын тавцанд ч гүнзгийрүүлэх алхам болох юм.
Монгол-Солонгосын дипломат харилцааны 35 жилийн ой
2025 он нь Монгол Улс болон БНСУ-ын хооронд дипломат харилцаа тогтоосны 35 жилийн ой тохиож байгаа онцгой жил. БНСУ нь Монголын “Гуравдагч хөрш” бөгөөд бүс нутгийн найдвартай түнш юм. Хоёр орны хамтын ажиллагаа сүүлийн жилүүдэд өргөжин тэлж, худалдаа, боловсрол, соёл, дэд бүтэц зэрэг олон чиглэлд амжилттай хэрэгжсээр байна.
