Вена хотод нэгэн сантехникч виллагийн засварын үеэр подвалын бетон шаланд нуусан төмөр хайрцаг олж, дотроос нь ойролцоогоор 2.4 сая ам.долларын үнэлгээтэй алтан зооснууд илрүүлжээ. Popular Mechanics-ийн мэдээлснээр, олдворын тал хувийг тэр авах боломжтой байж магадгүй байна.
Бетон шалаас цухуйсан олс олдвор руу хөтөлжээ
Олдвор Вена хотын Пенцинг дүүргийн нэгэн байшингийн подвалаас илэрсэн байна. Сантехникч бетон шалнаас цухуйсан олсыг анзаарч, татаж гаргахыг оролджээ. Гэвч олс хөдлөөгүй тул тэр бетоныг эвдэж эхэлсэн бөгөөд доороос нь зэвэрсэн төмөр хайрцаг гарч ирсэн байна.
Хайрцаг дотор нийт 30 кг орчим жинтэй алтан зооснууд байжээ. Зоос бүр дээр хөгжмийн зохиолч Вольфганг Амадей Моцартын дүрс байсан бөгөөд хэвлэлүүдийн мэдээлснээр тэдгээрийг Дэлхийн хоёрдугаар дайны үеийнх гэж үзэж байна.
“Ийм зүйл үнэхээр итгэмээргүй. Би 15 настайгаасаа барилгын салбарт ажиллаж байна. Заримдаа хэдэн зоос олддог ч ийм эрдэнэ бол огт өөр түвшний зүйл” гэж сантехникч Германы Today ток шоунд ярьжээ.
Олдворын тал хувийг авах боломжтой
Сонирхолтой нь уг олсыг хэд хоногийн өмнө өөр нэг ажилчин харсан ч ач холбогдол өгөөгүй байна. Харин сантехникч олс юунд бэхлэгдсэнийг шалгахаар шийдэж, эцэст нь бетон суурийн доороос хайрцгийг гаргаж авчээ.
Германы хэвлэлүүдийн мэдээлснээр, Австрийн олдсон эрдэнэсийн тухай журмын дагуу уг эрдэнэсийн үнийн тал хувийг олсон хүн авах боломжтой. Үлдсэн хэсэг нь үл хөдлөх хөрөнгийн эзэнд очих ёстой аж.
Ийм төрлийн олдвор Европт үе үе илэрдэг. Тухайлбал, Их Британид хайгуулчид XI зууны 2584 мөнгөн зоос олж, тэдгээрийг 5.6 сая ам.доллар орчимд үнэлж байв. Мөн Чехэд нэгэн эмэгтэй зугаалж явахдаа хоёр мянга гаруй дундад зууны мөнгөн зоос олжээ.
