Судасны даралт өндөртэй тэмцэх нь зөвхөн тархины цус харвалтаас сэргийлээд зогсохгүй, сэтгэцийн доройтлын (деменци) эрсдлийг ч бууруулах боломжтой болохыг Америк, Хятадын эрдэмтдийн хамтарсан судалгаа баталжээ.
The Guardian мэдээлснээр, артерийн даралтыг эмчилгээ, амьдралын хэв маяг өөрчлөх болон эмнэлгийн зөвлөгөөгөөр дамжуулан хянаж чадвал ой ухаан доройтох эрсдэл 15% хүртэл буурдаг байна.
Судалгааны талаар
Хятадын хөдөө орон нутгийн 34,000 хүн уг судалгаанд оролцсон бөгөөд бүгд хянагдаагүй гипертонитой байв. Тэднийг дараах хоёр бүлэгт хуваажээ:
- Интенсив эмчилгээний бүлэг — оролцогчдод үнэгүй эм, зөв хооллолт, хөдөлгөөн хийх зөвлөгөө болон даралт хэмжих багаж өгсөн.
- Энгийн аргаар эмчлүүлсэн бүлэг — зөвхөн ердийн эмчилгээ хийлгэсэн, нэмэлт тусламж аваагүй.
Дөрвөн жилийн дараа, нэмэлт тусламж авсан бүлэгт ой ухаан муудах тохиолдол 15%-иар, когнитив (танин мэдэхүйн) чадвар алдагдах эрсдэл 16%-иар бага байжээ.
Профессор Тара Спайрес-Джонс:
“Даралтыг тогтвортой түвшинд хадгалах нь хөгшрөлтийн үед тархийг хамгаалах чухал арга. Гэхдээ энэ нь бүх хүнд үр дүнтэй гэсэн үг биш. Зарим оролцогчид тусламж авсан ч деменци үүссэн.”
Эрдэмтэд уг аргыг өөр улс орнуудад, урт хугацааны турш дахин судалж, үр дүнгийн ерөнхий байдал, давтагдах боломжийг шалгах хэрэгтэй хэмээн зөвлөж байна.
