Монгол Улсын Их Хурлын 2026 оны хаврын ээлжит чуулганы 2026.04.23-ны өдрийн нэгдсэн хуралдаанаар хүний амь нас, эрүүл мэндийг аврах чухал ач холбогдолтой Эрхтэн, эд, эс шилжүүлэн суулгах тухай хуулийн төслийг хэлэлцэж эхэллээ. Үдээс өмнөх хуралдаан 10.00 цагт 51.6 хувийн ирцтэйгээр нээгдэж, уг хуулийн төслийн анхны хэлэлцүүлгийг хийв. Уг хуулийн төслийг УИХ-ын гишүүн Ж.Чинбүрэн, Ж.Алдаржавхлан, А.Ариунзаяа, Н.Батсүмбэрэл нар боловсруулж, 2025 оны гуравдугаар сарын 31-ний өдөр өргөн мэдүүлсэн бөгөөд Хүний хөгжил, нийгмийн бодлогын байнгын хорооны санал, дүгнэлтийг ажлын хэсгийн ахлагч Б.Баярбаатар танилцуулсан юм.
Ажлын хэсгийн зүгээс хуулийн төслийг олон улсын жишигт нийцүүлэх чиглэлээр 70 гаруй зарчмын зөрүүтэй саналыг бэлтгэжээ. Үүнд нэр томьёог салаа утгагүй болгож, “сорьц, хүйн эд, үндэсний хүлээх жагсаалт” зэрэг ойлголтуудыг нарийвчлан тусгаснаас гадна эд, эсийг хадгалах “Био банк”-ны тухай зохицуулалтыг шинээр оруулсан байна. Мөн амьд болон амьгүй донорт тавигдах шаардлагыг Дэлхийн эрүүл мэндийн байгууллага болон Истанбулын тунхаглалын зарчимд нийцүүлэн боловсруулжээ.
Байнгын хорооны хэлэлцүүлгийн явцад гишүүд дараах асуудлуудад гол анхаарлаа хандуулж, саналаа солилцсон байна. Үүнд:
- Амьгүй донорын ар гэрийнхнээс зөвшөөрөл авах үйл явцыг шуурхай бөгөөд ёс зүйтэй болгох;
- Хүлээх жагсаалтын шударга, ил тод байдлыг хангах, дараалалд хөндлөнгөөс нөлөөлөхгүй байх тогтолцоог бүрдүүлэх;
- Эрхтний наймаа, арилжааны шинжтэй үйлдлээс урьдчилан сэргийлэх, аюулгүй байдлыг хангах;
- Хүүхэд донорын асуудал болон тэдний хүсэл зоригийг хэрхэн хүндэтгэх эрх зүйн зохицуулалт;
- Донор болсон иргэдийн тэтгэмж, асаргаа сувилгаа болон оршуулгын зардлын эх үүсвэрийг тодорхойлох.
Хэлэлцүүлгийн үеэр гишүүд хуулийн төслийг хэрэгжүүлэхэд шаардлагатай төсөв, хүний нөөцийн чадавх болон хөдөө орон нутгийн иргэдэд хүрэх үйлчилгээний хүртээмжийг онцгойлон тодруулж байлаа. УИХ-ын гишүүн Г.Ганбаатар эрхтний наймаанаас сэргийлэх, технологийн нууцлалыг хангах асуудлыг хөндсөн бол УИХ-ын гишүүн С.Одонтуяа хүйн эд, үүдэл эсийг ашиглах харилцааг дэлхийн жишигт нийцүүлэх шаардлагатайг сануулсан юм. Ажлын хэсгийн боловсруулсан зарчмын зөрүүтэй саналуудаар санал хураах үйл явцыг чуулганы үдээс хойших хуралдаанаар үргэлжлүүлэн явуулахаар тогтов.
