Энэ сарын 21-нээс 23-ны өдрүүдэд Монгол орны нийт нутгаар цаг агаарын нөхцөл байдал тогтуун, өдөртөө нэлээд дулаахан байх төлөв гарчээ. Маргаашийн тухайд ихэнх нутгаар үүл солигдох боловч хур тунадас орохгүй, тэнгэр цэлмэг байх тул иргэд амралт, зугаалгаа төлөвлөхөд таатай нөхцөл бүрдэж байна.
Салхины чиглэлийн хувьд нутгийн зүүн хэсгээр баруун хойноос, бусад нутгаар баруунаас секундэд 5-10 метр хурдтай салхилах аж. Харин тал хээрийн бүс нутгаар салхины хурд үе үе секундэд 13-15 метр хүрч ширүүсэхийг цаг уурын байгууллагаас анхааруулж байна.
Бүс нутгуудаар хүлээгдэж буй агаарын температурын үзүүлэлтүүд:
- Дархадын хотгор, Завхан голын эх, Хүрэнбэлчир, Хэнтийн уулархаг нутаг, голуудын (Сэлэнгэ, Ерөө, Тэс, Туул, Тэрэлж, Хэрлэн, Онон, Улз, Халх) хөндийгөөр: +4…+9 градус дулаан.
- Их нууруудын хотгор болон говийн бүс нутгийн өмнөд хэсгээр: +16…+21 градус дулаан.
- Бусад нутаг дэвсгэрээр: +9…+14 градус дулаан байна.
Нийслэл Улаанбаатар хот орчмоор багавтар үүлтэй, хур тунадас орохгүй тогтуун байх нь. Салхи баруун хойноос секундэд 6-11 метр хурдтай салхилах бөгөөд агаарын температур өдөртөө +10-аас +12 градус дулаан байх урьдчилсан мэдээ иржээ.
