Монголын чөлөөт бөхийн түүхэнд Азийн аваргын 10 дахь алтан медалийг эх орондоо авчирсан тамирчин бол Э.Даваанасан юм. Түүний амжилтын замнал зөвхөн дэвжээн дээрх ялалтаар хэмжигдэхгүй, харин бага нас, спортод хөл тавьсан үе, туулсан сорилт, олон улсын тавцанд гаргасан ахиц дэвшлээр тодорхойлогдож байна.
Э.Даваанасан Говь-Алтай аймгийн Цогт суманд төрсөн. Тэрбээр сумандаа долоон удаа түрүүлсэн сумын заан Лувсандоржийн ач охин бөгөөд авга ах Л.Цэрэнтогтох нь улсын начин цолтой бөх юм. Ээж, гурван дүүгийн хамт өссөн түүний хувьд спортын уур амьсгалтай гэр бүлийн нөлөө багаас нь мэдрэгдэж байжээ.
Тэр Улаанбаатар хотод ирж 44 дүгээр дунд сургуульд суралцахдаа хөнгөн атлетикаар хичээллэж эхэлсэн байна. Ойрын зайн гүйлтээр чамгүй амжилт гаргаж, БНСУ-ын Инчёнд болсон өсвөр үеийн олон улсын тэмцээнд 1500 метрийн зайд түрүүлж байв.
Хожим нь Спортын төв сургуулийн нэрэмжит хөнгөн атлетикийн тэмцээнд түрүүлсэн нь түүний спортын замналд шинэ эргэлт авчирчээ. Тухайн үед тус сургуулийн захирал Ч.Зоригтбаатар чөлөөт бөхөөр хичээллэх санал тавьснаар Э.Даваанасан 2012 онд Спортын төв сургуулийн чөлөөт бөхийн багш П.Чулуунбаатар, Ц.Энхбаяр нараар бөхийн эрдэм заалгаж эхэлсэн байна.
Түүний чөлөөт бөхийн анхны медаль нь 2013 оны ТСБТСДуС-ээс зохион байгуулдаг “Тэмүүлэл” тэмцээний 54 кг-ын жингийн хүрэл медаль байлаа. Үүнээс ердөө жилийн дараа буюу 2014 онд Тайланд улсад болсон Азийн АШТ-ээс мөнгөн медаль хүртэж, олон улсын тавцанд анхны том амжилтаа үзүүлсэн юм.
Э.Даваанасангийн хамгийн дурсамжтай барилдаан нь 2014 оны өсвөр үеийнхний Азийн АШТ аж. Тэр тэмцээний үеэр нүдээ гэмтээсэн ч хүндхэн өрсөлдөөнийг даван туулж медаль хүртсэн нь түүний тэсвэр, тэмцэгч занг илтгэсэн үйл явдал болсон байна.
Олон улсын дэвжээнд тасралтгүй өрсөлдсөөр тэр “Осло-2021” ДАШТ-нд анх удаа оролцсон ч Канадын бөхөд ялагдсан. Гэсэн ч удалгүй Цэргийн спортын наадмаас хүрэл медаль хүртэж, дараа дараагийн тэмцээнүүдэд амжилтаа ахиулсаар байв.
Түүний өндөр түвшний амжилтуудаас онцолбол, 2019 онд алдарт бөх Иван Ярыгины тэмцээнд нутгийн бөх МУГТ С.Батцэцэгтэй үлдэж мөнгөн медаль хүртсэн. Мөн тэрбээр ААШТ-ий хошой хүрэл медальтай бөгөөд 2022, 2023 онд дараалан медаль авсан нь түүний тогтвортой амжилтыг баталсан үзүүлэлт юм.
Э.Даваанасан “Белград-2023” ДАШТ-ий 72 кг-ын жинд мөнгөн медаль хүртсэн нь карьерт нь онцгой байр суурь эзэлдэг. Үүний дараа өнгөрөгч 2024 оны Парисын олимпод эх орноо төлөөлөн анх удаа оролцож, шагналт есдүгээр байрт шалгарсан байна.
Хэдийгээр өнгөрсөн оны ААШТ-д долдугаар байрт орсон ч тэр замналаа зогсоосонгүй. 2025 оны Улаанбаатарын нээлттэй тэмцээнээс мөнгөн медаль хүртэж, энэ оны УАШТ-д 5 дахь удаагаа түрүүлснээр формоо хадгалж буйгаа харуулсан юм.
Өдгөө “Алдар” спорт хорооны тамирчин Э.Даваанасан гавьяат тамирчин Б.Одончимэгийн удирдлага дор бэлтгэл сургуулилтаа хийж байна. Түүний хүндэтгэж, үлгэр дуурайлал авдаг тамирчин нь дэлхийн шилдэг бөх Каори Ичо бөгөөд энэ нь түүний барилдааны үзэл, зорилгоос тодорхой харагддаг.
Саяын ААШТ-ий алтан медалийн төлөөх барилдаанд тэр Дэлхийн аваргын мөнгөн медальт, эзэн орны бөх Медет Кызыг ялж, алтан соёмбот далбаагаа Бишкекийн тэнгэрт мандууллаа. Ийнхүү Э.Даваанасан Монголын чөлөөт бөхөд Азийн аваргын 10 дахь алтан медалийг авчирсан тамирчнаар нэрээ мөнхөллөө.
- Говь-Алтай аймгийн Цогт суманд төрсөн
- Хөнгөн атлетикаас чөлөөт бөхөд шилжсэн
- “Белград-2023” ДАШТ-ээс мөнгөн медаль хүртсэн
- 2024 оны Парисын олимпод анх удаа оролцсон
- ААШТ-ий алтан медалийг Бишкекийн дэвжээнээс авчирсан
