Эх орноо хамгаалах бэлтгэл нөөцийг бүрдүүлэх, оюутан залууст цэргийн анхан шатны мэдлэг, сахилга бат олгох зорилготой “Оюутан цэрэг” хөтөлбөрийн энэ жилийн бүртгэл албан ёсоор эхэллээ. Бүртгэлийг 2026 оны 3 дугаар сарын 1-ний өдрөөс 3 дугаар сарын 10-ныг дуустал E-Mongolia системээр дамжуулан цахимаар хүлээн авч байна.
Оюутнууд системд нэвтрэн “Оюутан цэргийн анхан шатны бүртгэл” гэж хайснаар хүсэлтээ илгээх бөгөөд шалгуурт нийцсэн тохиолдолд системээс баталгаажуулах мэдэгдэл очих юм.
Хөтөлбөрт хамрагдах үндсэн шалгуурууд:
- Магадлан итгэмжлэгдсэн их, дээд сургуулийн 1, 2, 3-р дамжааны оюутан байх.
- Сурлагын голч дүн (I улирлын байдлаар) 2.8 болон түүнээс дээш байх.
- 2026 оны 6 дугаар сарын 15 гэхэд 18 нас хүрсэн байх.
- Эрүүл мэндийн даатгал төлөгдсөн байх.
Цахим бүртгэлд тэнцсэн оюутнууд 3 дугаар сарын 11-ний өглөөний 08:00 цагаас эхлэн харьяа дүүрэг, аймгийнхаа Цэргийн штабт очиж бүртгэлээ баталгаажуулна. Ирэхдээ иргэний үнэмлэх, цэргийн үүрэгтний үнэмлэх болон цээж зурагтайгаа очих шаардлагатай.
Засгийн газрын тогтоолын дагуу зохион байгуулагддаг энэхүү сургалт нь оюутнуудад бие бялдрын бэлтгэлжилтийн зэрэгцээ харилцааны соёл, ёс зүйн чухал мэдлэгийг олгодог. Дэлгэрэнгүй мэдээллийг Батлан хамгаалах яамны 1800-1144 дугаарын утсаар авах боломжтой.
