Нийслэлийн Ерөнхий боловсролын 23 дугаар сургуулийн сурагчид орчин үеийн усан бассейн болон спорт заал бүхий шинэ байгууламжтай боллоо. Чингэлтэй дүүргийн нэгдүгээр хороонд байрлах тус сургуулийн өргөтгөл барилгыг Улсын комисс хүлээн авч, ашиглалтад оруулахад бэлэн болжээ. Нийт 9.2 тэрбум төгрөгийн төсөвт өртөгтэй уг бүтээн байгуулалтыг нийслэлийн төсвийн хөрөнгөөр 2024 оноос эхлэн хоёр жилийн хугацаанд барьж гүйцэтгэсэн байна.
Шинэ спорт цогцолбор нь тэнхлэгээрээ 34м х 36м хэмжээтэй, 2448 м.кв талбай бүхий хоёр давхар барилга юм. Барилгын нэгдүгээр давхарт 25м х 8.8м хэмжээтэй, олон улсын стандартад нийцсэн усан бассейнаас гадна багш, эмчийн өрөө, хувцас солих хэсэг, шүршүүр зэргийг иж бүрнээр нь шийджээ. Харин хоёрдугаар давхарт байрлах спорт заал нь зориулалтын шал, гэрэлтүүлэг болон шаардлагатай тоног төхөөрөмжөөр бүрэн тоноглогдсон байна.
Энэхүү байгууламжийн гол давуу тал нь эрүүл ахуйн өндөр шаардлага хангах технологийн шийдэлд оршиж байгаа юм:
- Бассейны усыг тусгай шүүлтүүрийн системээр тогтмол цэвэрлэдэг.
- Робот цэвэрлэгч ашиглан усан доторх ариун цэврийг хангадаг.
- Сурагчид стандартад нийцсэн тохилог орчинд усан спортоор хичээллэх боломж бүрдсэн.
- Төсвийн хуваарилалтын хувьд 2025 онд 7.1 тэрбум, 2026 онд 1.1 тэрбум төгрөгийг тус тус зарцуулахаар төлөвлөжээ.
Тус сургуулийн бүтээн байгуулалтыг “Гэрэлтжин” ХХК гүйцэтгэж, нийслэлийн Хөрөнгө оруулалтын газар техникийн хяналтыг хэрэгжүүлсэн байна.
