Украин болон Польш улсууд ирээдүйд хөлбөмбөгийн дэлхийн аварга шалгаруулах тэмцээнийг (ДАШТ) хамтран зохион байгуулах боломжийг авч үзэж байгаа талаар Украины Залуучууд, спортын сайд Матвий Бидный “Politico” хэвлэлд өгсөн ярилцлагадаа дурджээ. 2030 болон 2034 оны тэмцээнийг зохион байгуулах орнууд хэдийн тодорсон тул тэдний хувьд дараагийн боломжит хугацаа нь 2038 он юм.
Украин, Польш улсууд өмнө нь “Евро 2012” Европын аварга шалгаруулах тэмцээнийг амжилттай хамтран зохион байгуулан туршлагатай. Иймээс уг туршлагадаа тугуурлан дэлхийн хэмжээний томоохон тэмцээнийг зохион байгуулахаар төлөвлөх нь логиктой бөгөөд энэхүү томоохон төсөл нь Украины дайны дараах сэргээн босголтод гадаадын хөрөнгө оруулагчдын анхаарлыг татах чухал боломж болно гэж М.Бидный үзэж байна.
Албан ёсны хүсэлт ба урьдчилсан нөхцөл
Гэсэн хэдий ч энэ нь одоогоор урт хугацааны алсын хараа, төсөөлөл бөгөөд дараах нөхцөл байдлууд бий:
- Албан ёсны хүсэлт гараагүй: Украины Спортын яамнаас Польшийн талтай одоогоор албан ёсны санал солилцох эсвэл зөвлөгөөн хийх ажиллагаа эхлээгүй байна.
- Гол шаардлага: ДАШТ зохион байгуулах төлөвлөгөө нь Украины дайн дуусгавар болж, улс оронд тогтвортой энх тайван, аюулгүй байдал бүрэн бүрдсэний дараа хэрэгжих боломжтой юм.
Ташрамд дурдахад, 2030 оны ДАШТ-ийг Испани, Португал, Марокко улсууд хамтран зохион байгуулж, зарим тоглолт Өмнөд Америкт болох бол 2034 оны тэмцээнийг Саудын Араб зохион байгуулахаар болоод байгаа билээ.
