Энэ жилийн отгон наадмуудын нэг болох Баян-Өлгий аймгийн баяр наадмын үндэсний бөхийн барилдаан шуугиантайхан өндөрлөлөө. “Эв Монгол” клубийн бөх, сумын заан Ш.Батырбек тус аймгийн наадамд цувраа олон чансаатай барилдаан хийн зургаа давж, аймгийн заан цолыг шинээр хүртсэн байна.
Тэрээр барилдааны турш туршлагатай бөхчүүдийг шил дараалан өвдөг сөхрүүлж, даваагаа ахиулсан юм. Түүний заан цолонд хүрэх замдаа буулган авсан бөхчүүдийг даваа бүрээр нь тодорхойлбол:
- Нэгийн даваанд: МУГТ, аймгийн арслан Х.Цагаанбаатар
- Хоёрын даваанд: Улсын заан Д.Анар
- Гурвын даваанд: Улсын начин Н.Мустафа
- Дөрвийн даваанд: Улсын харцага Г.Гантулга
- Тавын даваанд: Улсын начин Э.Мөнхбаатар
- Зургаагийн даваанд: Сумын заан Х.Жарданбек
Хэдийгээр Ш.Батырбек ийнхүү өндөр цолонд хүрсэн ч наадамчин олон болон үзэгчдийн дунд бөхийн барилдааны шударга байдалтай холбоотой багагүй эргэлзээ, хардлага үүссэн байна. Барилдааны үеэр наадамчид түүнд хандан “хүүхдийн мөнгө авчхаад унаачээ” хэмээн хашхирч байсан бөгөөд тавын давааны ам авалтын үеэр улсын начин Э.Мөнхбаатар утастайгаа удаан суусан нь үзэгчдийг цухалдуулж, “аймгийн начин цолны мөнгөө хурдан шилжүүлээч” гэх зэргээр эсэргүүцлээ илэрхийлжээ.
Үүнээс үүдэн наадмын дэвжээнд цол, ам байнга наймаалцаж, аймгийн начин цолны ханш 50 сая төгрөгт хүрсэн гэх ам яриа иргэдийн дунд эрчимтэй тархаад байна. Гэвч энэхүү яриа нь одоогоор албан ёсоор баталгаажаагүй бөгөөд баг, бөхчүүд эсвэл зохион байгуулагчдын хууль бус наймааны асуудлыг эцэслэн тогтоосон аливаа баримт, нотолгоо хараахан ил болоогүй байгаа юм.
