АНУ-ын Техас мужийн Остин хотод Alpha нэртэй хувийн сургууль нээгдэж, уламжлалт багш нарыг бүрэн хиймэл оюун ухаантай (AI) системээр орлуулжээ. Энэ сургуулийн сурагчид өдөрт ердөө хоёр цаг хичээллэдэг бөгөөд бүх сургалтын процессыг AI-д суурилсан аппликейшнүүдээр удирддаг гэж CBS News мэдээллээ.
Хэрхэн явагддаг вэ
AI алгоритм нь сурагч бүрийн түвшин, сурах хурд, сонирхолд тулгуурлан хувийн сургалтын төлөвлөгөө гаргадаг. Таван настай хүүхдүүд ч математик, байгалийн ухаан, уншлагын хичээлүүдийг өөрийн хурдаар судалдаг. Сургалтын зорилго нь тухайн хичээлийг “мастер түвшинд” буюу 90%-иас дээш үнэлгээтэй дүүргэх юм.
Сургуулийн ажилтнуудыг “чиглүүлэгчид (guides)” гэж нэрлэдэг бөгөөд тэд багш нар биш, харин сурагчдыг урамшуулж, сэдэлжүүлдэг хүмүүс юм. Тэдний цалин зургаан оронтой тоонд хүрдэг. “Бид хүүхдүүдтэй хамтран ажилладаг — тэд өөрийн хэмнэлээр суралцах үед үр дүн хэд дахин сайжирдаг,” хэмээн нэг чиглүүлэгч Люк Филлипс хэлжээ.
Өдрийн хоёр дахь хуваарь
Үдээс хойш сурагчид төслүүд дээр ажиллаж, санхүүгийн мэдлэг болон илтгэх ур чадвар зэрэг амьдралын чухал ур чадваруудыг эзэмшдэг. Сургуулийн үүсгэн байгуулагч Маккензи Прай эдгээр чадваруудыг “үнэлж баршгүй хөрөнгө” гэж тодорхойлсон байна.
Ийм боловсролын хэлбэр хямд биш — Alpha сургуульд сурах жилийн төлбөр доод тал нь 40,000 ам.доллар. Гэсэн хэдий ч төсөл идэвхтэй өргөжиж байгаа бөгөөд одоогоор 16 кампустай. АНУ-ын боловсролын сайд Линда Макмэхон ч сургуулийг зочилж үзсэн байна.
Гэхдээ системийг бүгд сайшаадаггүй. Зарим шинжээчид “хиймэл оюун ухаан багшийг бүрэн орлож чадахгүй” хэмээн шүүмжилж, төслийг “баян хүмүүст зориулсан туршилт” гэж нэрлэжээ. Прай өөрөө ч “систем төгс биш бөгөөд сайжруулах шаардлагатай” гэдгийг хүлээн зөвшөөрсөн байна.
Гэсэн ч Alpha сургуулийн төлөөлөгчид ирээдүйн боловсрол хиймэл оюун ухаанд тулгуурлах болно гэдэгт итгэлтэй байгаа аж. Тэдний үзэж буйгаар AI нь хүүхэд бүрийн хэрэгцээнд тохируулан хөтөлбөр боловсруулж, уламжлалт багш нараас илүү үр дүнтэй сургалт явуулж чадна.
