Балбын нийслэл Катманду болон бусад хотуудад болсон эсэргүүцлийн жагсаал эмгэнэлтээр өндөрлөж, 22 иргэн цагдаа нарын буудлагад өртөн амь үрэгдэж, 100 гаруй хүн шархадсан байна. Шархдагсдын дунд хууль сахиулагчид ч багтжээ.
Жагсаалд мянга мянган залуус, өсвөр насныхан оролцсон бөгөөд тэд нийгмийн сүлжээг хаах шийдвэр болон улс төр дэх авлигыг эсэргүүцэж, төрийн байгууллагуудын эсрэг тэмцжээ. Өсвөр насныхан сургуулийн дүрэмт хувцастай оролцсон нь энэ жагсаалыг онцгой болгосон байна.
Цагдаа нар жагсагчдыг тараахын тулд нулимс асгаруулагч хий, даралттай ус ашигласан ч мөргөлдөөн хурцдаж, бодит сум хэрэглэсэн байж болзошгүйг эмч нарын дүгнэлт харуулжээ. Хүний эрхийн байгууллагууд энэ хэрэгт хараат бус мөрдөн шалгалт явуулахыг шаардаж байна.
Улс төрийн хямрал
- Ерөнхий сайд КП Шарма Оли огцорч, улс төрийн тодорхойгүй байдал үүсэв.
- Жагсагчид өмнөх Ерөнхий сайд Шэр Бахадур Дэуба зэрэг улс төрчдийн байр, намын байранд халдсан.
- Засгийн газар жагсагчидтай хэлэлцээ эхлүүлээгүй бөгөөд дараагийн Ерөнхий сайд хэн болох нь тодорхойгүй байна.
Цахим сүлжээ хаалт ба залуусын дургүйцэл
Өнгөрсөн долоо хоногт Засгийн газар 26 цахим сүлжээг (WhatsApp, Facebook, Instagram, YouTube гэх мэт) хаасан нь иргэдийн бухимдлыг улам нэмэгдүүлэв. Албан ёсны тайлбараар энэ арга хэмжээг “хуурамч мэдээлэл, цахим залилан, үзэн ядалтын агуулгатай тэмцэх зорилготой” гэж мэдэгдсэн ч олон нийт эрх баригчид шүүмжлэлтэй агуулгыг хаахыг зорьсон гэж үзэж байна.
Балбын 17 сая орчим интернэт хэрэглэгчидтэй оронд мэдээлэл дамжуулах, харилцаа холбоо тогтооход хүндрэл үүссэн. Энэ нь боловсролд сөргөөр нөлөөлж, онлайн сургалтад оролцох боломжийг ч боогдуулсан гэж оюутан, сурагчид ярьжээ.
Авлига ба “Nepo” эсэргүүцэл
Жагсагчид зөвхөн цахим хязгаарлалтад бус, авлига, ядуурлын эсрэг дуу хоолойгоо нэгтгэв. Тэд “Nepo” хэмээх үгийг өргөн хэрэглэсэн нь “nepotism” буюу төрийн өндөр албан тушаалтнууд гэр бүлийнхнээ давуу эрхтэй байлгадаг тогтолцоог шүүмжилсэн хэлбэр юм.
Саяхан TikTok, Instagram-д улс төрчдийн гэр бүлийнхэн брэндийн хувцас, үнэтэй машин, гадаад аяллаа гайхуулсан бичлэгүүд нийтлэгдсэн нь олон нийтийн бухимдлыг улам лавшруулжээ.
Ирээдүйн төлөв
Арми жагсаал дахин өрнөвөл бүх хүчнээ дайчилна гэж анхааруулсан. Хотын төрийн байгууллагуудын ойролцоо нэвтрэх хөдөлгөөнийг хязгаарлаж, хамгаалалтыг чангатгасан ч залуус тэмцлээ үргэлжлүүлэхээ мэдэгдсэн байна.
