Франц даяар Засгийн газрын бодлогыг эсэргүүцсэн хоёр дахь томоохон жагсаал Бямба гарагт болж, Дотоод хэргийн яамны тооцоогоор 410 мянга орчим хүн оролцжээ. Сургуулийн санхүүжилтийг нэмэгдүүлэх, багшийн хүрэлцээг сайжруулах, амьжиргааны өртгийн өсөлтийг бууруулахыг шаардсан энэхүү хөдөлгөөн сүүлийн нэг сарын хугацаанд улам өргөжсөн байна.
Парист болсон жагсаал эхэндээ тайван үргэлжилсэн ч төгсгөл хэсэгт мөргөлдөөн гарчээ. Францын Засгийн газрын мэдээлснээр цагдаа нар орон даяар 1,000 орчим хүнийг баривчилсан байна.
Үүнээс долоо хоногийн өмнө болсон эхний томоохон жагсаалын үеэр Францын хэд хэдэн хотод үймээн самуун, дээрэм тонуул, хүчирхийллийн тохиолдлууд гарсан тул энэ удаад аюулгүй байдлын хамгаалалтыг эрс нэмэгдүүлжээ.
Парист цагдаа, жагсагчдын хооронд мөргөлдөөн гарчээ
Парисын жагсаалын төгсгөлийн цэг болох хотын зүүн хэсэгт нүүрээ халхалсан зарим оролцогч цагдаа нарын зүг янз бүрийн эд зүйл болон салют шидсэн байна.
Хариуд нь цагдаагийн алба хаагчид нулимс асгаруулагч хий, дүлийрүүлэгч гранат болон усан буу ашиглажээ.
Дотоод хэргийн яамны мэдээллээр энэ удаагийн жагсаалд улс даяар 410 мянган хүн оролцсон нь өмнөх амралтын өдрүүдэд бүртгэгдсэн 550 мянган оролцогчоос цөөн үзүүлэлт юм.
Харин жагсаалыг зохион байгуулахад оролцсон CGT үйлдвэрчний эвлэл өөр тоо танилцуулж, улс даяар 800 мянга орчим хүн гудамжинд гарсан гэж мэдээлжээ.
Парис хотын хувьд Дотоод хэргийн яам 110 мянган оролцогч тоолсон бол CGT 250 мянга орчим хүн оролцсон гэж мэдэгдсэн байна.
Ийнхүү жагсаалын хамрах хүрээний талаарх албан байгууллага болон зохион байгуулагчдын тооцоо мэдэгдэхүйц зөрүүтэй байна.
Жагсаал сургуулийн асуудлаас эхэлж, улсын хэмжээний хөдөлгөөн болжээ
Эсэргүүцлийн хөдөлгөөн анх Парисаас зүүн өмнөд хэсэгт байрлах нэгэн ахлах сургуульд багшийн хүрэлцээ муу байгааг эсэргүүцсэн жижиг жагсаалаас эхэлсэн байна.
Улмаар сурагчид, багш нар болон иргэд ахлах сургуулиудын санхүүжилтийг нэмэгдүүлэх, багшийн орон тоог өсгөх шаардлага тавьснаар хөдөлгөөн өргөжжээ.
Үүн дээр эрчим хүч болон өдөр тутмын хэрэглээний үнийн өсөлт нэмэгдсэнээр жагсаал сургуулийн асуудлаас давж, Засгийн газрын эдийн засаг, нийгмийн бодлоготой холбоотой өргөн хүрээний эсэргүүцэл болон хувирсан байна.
Францын Үндэсний статистикийн хүрээлэн INSEE-ийн мэдээллээр есдүгээр сард эрчим хүчний үнэ өмнөх оны мөн үеэс 21.3 хувиар өссөн нь инфляцыг 3.1 хувьд хүргэхэд нөлөөлжээ.
Ерөнхийлөгч Emmanuel Macron Баасан гарагт ахлах сургуулийн төлөөлөгчидтэй уулзахдаа их сургуульд элсэх журмыг бүрэн шинэчлэхээ мэдэгдсэн байна.
Гэсэн ч жагсаалыг зохион байгуулагчид тодорхой шийдвэр, арга хэмжээ зарлагдах хүртэл эсэргүүцлээ үргэлжлүүлнэ гэдгээ илэрхийлжээ.
70 мянган цагдаа дайчилсан байна
Францын Дотоод хэргийн сайд Laurent Nuñez-ийн мэдээлснээр Бямба гарагийн жагсаалын аюулгүй байдлыг хангахад 70 мянга орчим цагдаагийн алба хаагч ажиллажээ.
Тэднийг нисдэг тэрэг, хуягт машин болон бусад тусгай техникээр дэмжсэн байна.
Nuñez орон даяар 1,000 орчим хүн баривчлагдсан гэж мэдэгдээд, мэдээллийг эцэслэн нэгтгэх явцад энэ тоо өсөж болзошгүйг дурджээ.
Түүний хэлснээр хүчний байгууллагууд өмнөх амралтын өдрүүдэд гарсан шиг өргөн хүрээтэй дээрэм тонуул, эд хөрөнгийн сүйтгэл давтагдахаас тодорхой хэмжээнд сэргийлж чадсан байна.
Францын хэвлэлүүдийн мэдээлснээр Лион, Клермон-Ферран, Страсбург, Бордо хотод цагдаа нар нулимс асгаруулагч хий хэрэглэжээ. Харин Ницца болон Нант хотод усан буу ашигласан байна.
Ницца хотын төвд хэт барууны бүлгийн хүмүүс болон жагсагчдын хооронд мөргөлдөөн гарсны улмаас 11 хүнийг баривчилсан талаар орон нутгийн эрх баригчид мэдээлжээ.
Мөн цагдаагийн ажиллагааны үеэр зарим өсвөр насны жагсагч хүнд гэмтсэн тухай мэдээлэл гарсан бөгөөд сөрөг хүчний улстөрчид хүч хэрэглэсэн ажиллагааг шүүмжилж байна.
Сөрөг хүчний намууд ч байр сууриа илэрхийлэв
Эсэргүүцлийн хөдөлгөөн өргөжихийн хэрээр Францын улс төрийн хүчнүүд байр сууриа илэрхийлж эхэлжээ.
Хэт барууны “Үндэсний нэгдэл” нам Засгийн газрыг иргэдийн аюулгүй байдлыг хангаж чадахгүй байна гэж буруутгаж, дэмжигчдээ удахгүй болох сонгуулиар байр сууриа илэрхийлэхийг уриалсан байна.
Хэт зүүний улс төрч Jean-Luc Mélenchon жагсагчдыг дэмжиж, цагдаагийн байгууллагын арга хэмжээг шүүмжилжээ.
Ийнхүү нийгмийн асуудлаас эхэлсэн жагсаал сонгуулийн өмнөх улс төрийн хэлэлцүүлгийн нэг гол сэдэв болон хувирч байна.
Музейнууд хаалгаа барьжээ
Өмнөх амралтын өдрүүдийн үймээний үеэр Франц даяар 3,000 орчим дэлгүүр тоногдож, эвдэн сүйтгэгдсэн тухай мэдээлсэн байна.
Үүнтэй холбоотойгоор Бямба гарагт Парисын томоохон соёлын байгууллагууд аюулгүй байдлын үүднээс үйл ажиллагаагаа түр зогсоожээ.
Лувр, Орсе, Пикассогийн музей, мөн Cézanne-ийн үзэсгэлэн гарч буй Grand Palais хаалгаа барьсан байна.
Жагсаалын давалгаа нь 2017 онд анх Ерөнхийлөгчөөр сонгогдсон Emmanuel Macron-ы бүрэн эрхийн хугацааны төгсгөлийн үеийн томоохон сорилтуудын нэг болж байна.
Францын дараагийн Ерөнхийлөгчийг ирэх оны тавдугаар сард сонгохоор байгаа бөгөөд сургуулийн санхүүжилт, амьжиргааны өртөг, цагдаагийн ажиллагаа, нийтийн аюулгүй байдал зэрэг асуудал сонгуулийн өмнөх улс төрийн хэлэлцүүлэгт улам чухал байр суурь эзлэх төлөвтэй байна.
