Их Британийн Ланкашир гүнлэгт махан соусанд барилдах өвөрмөц дэлхийн аварга шалгаруулах тэмцээн зохион байгуулагджээ. Оролцогчид ойролцоогоор 1500 литр өтгөн соусаар дүүргэсэн талбайд хүч үзсэн талаар Daily Mail мэдээлэв.
Тэмцээн Бакап хотын крикетийн клубт болдог. Барилдаан эхлэхийн өмнө талбайг их хэмжээний соусаар дүүргэж, дараа нь өнгөлөг хувцасласан оролцогчид халтиргаатай “дэвжээ”-нд гардаг байна.
Тэмцээн бүр хоёр минутын хугацаатай. Ялагчийг зөвхөн өрсөлдөгчөө хэр сайн барилдсанаар нь бус, үзүүлбэрийн сонирхолтой байдал болон үзэгчдийн хариу үйлдлийг харгалзан тодруулдаг.
Ингэснээр тэмцээн спортын өрсөлдөөнөөс гадна үзвэрийн шинжтэй болдог байна.
2007 оноос хойш жил бүр зохион байгуулагдаж байна
Махан соусанд барилдах энэхүү тэмцээнийг анх 2007 онд зохион байгуулжээ. Тэр үеэс хойш хачирхалтай мэт санагдах энэхүү зугаа жил бүрийн уламжлалт тэмцээн болон өргөжиж, ер бусын аваргын цолны төлөө хүч үзэх хүсэлтэй оролцогчдыг татах болсон байна.
Тэмцээний хамгийн содон хэсэг нь өөрөө “дэвжээ” юм. Олон зуун литр махан соусан дунд хөл дээрээ тогтож үлдэх нь өрсөлдөгчөө ялахаас дутахгүй хэцүү сорилт болдог аж.
