Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Казахстан Улсад хийж буй төрийн айлчлал амжилттай үргэлжилж байна. Хоёр улсын Төрийн тэргүүн нар албан ёсны хэлэлцээ хийснийхээ дараа хэвлэл мэдээллийн төлөөлөгчдөд хандаж, хоёр орны харилцааг шинэ шатанд гаргах түүхэн шийдвэрүүдээ танилцуулсан юм.
Ерөнхийлөгч У.Хүрэлсүх хэлсэн үгэндээ 20 жилийн дараа хийгдэж буй энэхүү айлчлал нь хоёр орны ахан дүүсийн найрамдал, нөхөрлөлийг бататган бэхжүүлж буйг онцлов. Тэрбээр “Эрхэм хүндэт Ерөнхийлөгч Таны 2024 онд Монгол Улсад хийсэн түүхэн айлчлалын үеэр хоёр улсын найрсаг харилцааг шат ахиулан “Стратегийн түншлэл”-ийн өндөр түвшинд хүргэн хөгжүүлэх түүхэн шийдвэр гаргасныг эргэн дурсахад таатай байна” хэмээн тэмдэглэсэн юм. Айлчлалын хүрээнд талууд худалдааны эргэлтийг 500 сая ам.долларт хүргэх зорилт тавьж, зам тээвэр, логистикийн саад бэрхшээлийг арилгах хамтарсан ажлын хэсэг байгуулахаар тогтжээ.
Хэлэлцээний үеэр талууд хамтын ажиллагааны эрх зүйн үндсийг бэхжүүлэх чиглэлээр дараах салбаруудад 18 баримт бичигт гарын үсэг зурлаа:
- Соёл, шинжлэх ухаан, эрүүл мэнд, хэвлэл мэдээллийн салбар;
- Банк, санхүү, худалдаа, эдийн засаг болон эрдэс баялаг;
- Мэдээллийн технологи, уул уурхай, биеийн тамир, спорт;
- Орон нутгийн харилцаа буюу Хархорум-Алатау, Налайх-Талдык-орган хотуудын ах дүүгийн хэлхээ холбоо.
Ерөнхийлөгч К.Токаев Монгол Улсыг бүс нутгийн чухал түнш, найрсаг хөрш орон гэдгийг тодотгоод, Баян-Өлгий аймагт Казахстаны Консулын газар нээхээр болсон нь хоёр орны итгэлцлийн бодит илрэл болохыг дурдав. Тэрбээр “Айлчлалын үеэр “Стратегийн түншлэл” тогтоох тухай баримт бичигт гарын үсэг зурсан. Энэ нь мянган жилийн түүхтэй нөхөрлөлийн маань чухал бөгөөд түүхэн бичиг баримт юм” хэмээн мэдэгдлээ. Мөн тээврийн дөт зам нээх, Өскемен-Өлгий чиглэлд шинэ нислэг үйлдэх, Алтай дамжсан аялал жуулчлалын кластер хөгжүүлэх зэрэг дэд бүтцийн томоохон төслүүдийг идэвхжүүлэхээ илэрхийлсэн юм.
Байгаль орчныг хамгаалах чиглэлээр Монголын “Тэрбум мод” болон Казахстаны “Хоёр тэрбум мод” үндэсний хөдөлгөөнүүдийг уялдуулж, уур амьсгалын өөрчлөлттэй хамтран тэмцэхээр болсон нь онцлох шийдвэрүүдийн нэг байлаа. Талууд НҮБ болон олон улсын байгууллагуудын хүрээнд бие биеэ тууштай дэмжиж, Төв Азийн бүс нутгийн тогтвортой хөгжлийн төлөө хамтран ажиллахаа дахин нотолсон юм.
