Мансууруулах бодисын хор уршгийг уран сайхны аргаар таниулах, нийгэмд сэрэмжлүүлэг өгөх зорилготой “NO DRUG-Ганц удаа гэж үгүй” цуврал киноны нээлтийн мэдээллийг нэгтгэн хүргэж байна.
Өсвөр үеийнхэн болон залуусын дунд мансууруулах бодисын хэрэглээ бодит аюул болоод буй энэ үед “VOO Original Series” төслийн хүрээнд “NO DRUG-Ганц удаа гэж үгүй” олон ангит кино 2026 оны 3 дугаар сарын 12-ны өдөр нээлтээ хийхээр боллоо.
Уран бүтээлийн онцлог:
- Баг хамт олон: Найруулагч Т.Алтантуяа (“Ану Хатан”, “Хөх Тавилан” киноны найруулагч) Хар Тамхитай Тэмцэх алба болон VOO-тэй хамтран бүтээсэн.
- Дүрүүдэд: МУГЖ С.Ариунбямба, МУСТА Н.Баярмаа, Ардын жүжигчин Ц.Төмөрбаатар, МУГЖ Ц.Төмөрхуяг нарын чадварлаг уран бүтээлчид тогложээ.
- Зорилго: “Ганц удаа л туршъя” гэх буруу ойлголтыг залруулж, донтолт гэр бүл, нийгэмд ямар их хор хохирол учруулдгийг бодит түүхээс сэдэвлэн харуулах.
Сэтгэл түгшээсэн тоон баримтууд:
- Сүүлийн 9 жилд Монгол Улсад мансууруулах бодистой холбоотой 2,100 гэмт хэрэг бүртгэгджээ.
- Холбогдогчдын 56 хувийг 13-25 насныхан буюу өсвөр үе, залуучууд эзэлж байна.
- Илэрсэн нэг хэрэглэгчийн цаана 4–6 далд хэрэглэгч байх эрсдэлтэй гэж мэргэжилтнүүд үздэг.
“Хэн ч донтогч болж төрдөггүй. Харин мэдээлэлгүй байдал, анхаарал сул орчин эрсдэлийг нэмэгдүүлдэг.”
Уг цуврал нь зөвхөн үзвэр бус, эцэг эхчүүдэд хүүхэдтэйгээ нээлттэй харилцах, зан төлөвийн өөрчлөлтийг анзаарах, урьдчилан сэргийлэх мэдлэг олгох зорилготой нөлөөллийн ажил юм. Шинэ ангиуд долоо хоног бүрийн Пүрэв гарагт VOO онлайн платформ болон Mobihome үйлчилгээгээр үзэгчдэд хүрнэ.
