БНХАУ-ын ӨМӨЗО-ы Ордос хотод үргэлжилж буй жүдо бөхийн насанд хүрэгчдийн Азийн аварга шалгаруулах тэмцээний эхний өдөр Монголын хоёр жүдоч финалд шалгарч, мөнгөн медалийн болзол хангаад байна.
Энэ жил дөнгөж 19 настай Ж.Анударь болон өсвөрийн дэлхийн аваргын хүрэл медальт М.Нандин-Эрдэнэ нар аваргын төлөө дэвжээнд гарахаар болсон нь Монголын багийн хувьд онцлох амжилт боллоо.
Монголын хоёр жүдочийг финалд Узбекистаны бөхчүүд хүлээж байна
Эмэгтэйчүүдийн 48 кг-ын жинд Ж.Анударь финалд Узбекистаны Хаядароватай барилдахаар оноолт таарчээ. Харин 52 кг-д М.Нандин-Эрдэнэ мөн Узбекистаны Кадамбоеватай алтан медалийн төлөө хүч сорих юм.
Ингэснээр эхний өдрийн эмэгтэйчүүдийн хоёр жинд Монголын тамирчид аваргын төлөө өрсөлдөх эрхтэй болж, тивийн дэвжээнд хүчтэй өрсөлдөхөө харууллаа.
Т.Түмэнжаргал хүрэл медаль хүртэж, бусад жүдочид тэмцээнээ өндөрлүүлэв
Эрэгтэйчүүдийн 60 кг-ын жинд Т.Түмэнжаргал хүрэл медаль хүртэж, Монголын багийн медалийн салхийг хагалсан байна. Харин 66 кг-д барилдсан К.Ёолк, Ө.Жанцандорж нар дагах барилдаанд ялагдсанаар тэмцээнээ дуусгажээ.
