Сонгинохайрхан дүүргийн нутаг дэвсгэрт иргэдийг барьцаалж, их хэмжээний мөнгө шаардсан ноцтой хэргийг цагдаагийн байгууллага шуурхай ажиллагааны дүнд илрүүлжээ. Хэрэгт сэжиглэгдсэн 35 настай хоёр залууг саатуулсан бөгөөд барьцаалагдсан иргэдийг ямар нэгэн хохиролгүйгээр аварсан байна.
Хэрэг явдлыг сөхвөл, иргэн Б.Д болон Н.У нар энэ сарын 9-ний өдөр “Мерседес бенз” маркийн автомашинаар зуслан руугаа явж байхдаа халдлагад өртжээ. Зэвсэглэсэн хоёр этгээд тэдэнд хутга тулан заналхийлж, 1.5 тэрбум төгрөг өгөхийг шаардсан байна.
Улмаар эхнэрийг нь барьцаанд үлдээж, нөхрөөр нь 300 мянган ам.доллар болон түүнтэй тэнцэх хэмжээний юанийг бэлтгүүлэн есдүгээр сарын 11-ний өдөр авахаар тохиролцсон аж.
Сэжигтнүүдийг саатуулж, мөрдөн шалгаж байна
Цагдаагийн байгууллагаас тусгай ажиллагаа явуулж, барьцаалагдсан иргэдийн амь нас, эрүүл мэндийг аюулгүй болгон холбогдох этгээдүүдийг баривчилжээ. Одоогоор сэжигтнүүдийг ШШГЕГ-ын харьяа Цагдан хорих 461 дүгээр ангид хойшлуулшгүйгээр цагдан хориод байна.
Хэрэгт холбогдогчид урьдчилан төлөвлөсний дагуу тухайн иргэдийг барьцаалж, мөнгө нэхсэнээ мөрдөн шалгах ажиллагааны явцад хүлээсэн гэх бөгөөд хэргийн нөхцөл байдлыг нарийвчлан тогтоохоор шалгалтын ажил үргэлжилж байна. Хэрэгт сэжиглэгдэн шалгагдаж байгаа нь тэдний гэм бурууг эцэслэн тогтоосон хэрэг биш юм.
