УИХ-ын чуулганы өнөөдрийн хуралдаанаар Эрчим хүчний сайд Б.Чойжилсүрэн, Боловсролын сайд П.Наранбаяр нарыг чөлөөлөх болон шинэ сайд нарыг томилох асуудлыг хэлэлцэхээр төлөвлөсөн ч ирц хүрээгүйгээс хуралдаан хойшлогдлоо. Ийнхүү чухал асуудал хэлэлцэгдэхгүй саатсан нь улс төрийн нөхцөл байдал хурцдаж буйг илтгэж байна.
Энэ талаар УИХ-ын дарга Н.Учрал байр сууриа илэрхийлэхдээ, “Өнөөдөр ирц бүрдээгүйн улмаас чуулганы хуралдаан хойшиллоо. МАН-ын бүлгийн дарга Ж.Батжаргал, АН-ын бүлгийн дарга О.Цогтгэрэл нар ирцээ бүрдүүл. Бүлгүүдийнхээ хуралдааныг хий. Төрийн ажил тасралтгүй явах ёстой” хэмээн онцлов. Мөн тэрбээр АН-ын бүлгээс ямар нэгэн бичгээр ирүүлсэн шаардлага, хүсэлт байхгүй гэдгийг тодотгож, хуралдааныг албан ёсоор хойшлуулснаа мэдэгдсэн юм.
Нөгөө талд АН-ын бүлэг УИХ-ын дарга Н.Учрал МАН-ын даргын албан тушаалаа давхар хашиж байгаа нь зохимжгүй гэж үзэж, уг асуудлаар байр сууриа илэрхийлээд байна. Тэдний зүгээс намын дарга парламентын даргын үүргийг хавсран гүйцэтгэх нь зүй зохисгүй хэмээн үзэж буй нь улс төрийн маргааны гол сэдэв болоод байна.
Гишүүд ажлаа хариуцлагатай хийх хэрэгтэй шүү
Ард иргэдийн итгэлийг ингэж алдах хэрэггүй дээ