Поп од Бритни Спирс согтуугаар тээврийн хэрэгсэл жолоодсон хэргээ албан ёсоор хүлээн зөвшөөрч, шүүхээс оноох байсан хорих ялаа хөнгөлүүлсэн байна. Өдгөө 44 настай дуучин бүсгүй өнгөрсөн даваа гарагт (2026.05.04) Вентура хошууны шүүхэд өөрийн биеэр ирээгүй бөгөөд өмгөөлөгчөөрөө дамжуулан гэм буруугаа хүлээж байгаагаа мэдэгджээ. Ингэснээр тэрбээр нэг жилийн хугацаатай тэнсэн харгалзах ял сонсохоор болж байна.
Хэргийг эргэн сануулбал, Бритни Спирс өнгөрсөн гуравдугаар сарын 4-ний өдөр сэтгэцэд нөлөөлөх бодис хэрэглэсэн үедээ жолооны ард суусан шалтгаанаар баривчлагдсан юм. Тухайн үед түүний хэвлэлийн төлөөлөгч уг үйлдлийг нь ямар ч тайлбаргүйгээр буруушааж, байж боломгүй алдаа хэмээн мэдэгдэж байв. Прокурорын байгууллагаас өнгөрсөн долоо хоногийн пүрэв гарагт (2026.05.07) түүнийг согтууруулах ундаа болон мансууруулах бодис хослуулан хэрэглэсэн үедээ замын хөдөлгөөнд оролцсон хэмээн албан ёсоор буруутган шүүхэд шилжүүлсэн байна.
Бритни гэм буруугаа хүлээсний дараа дүүргийн прокурор Эрик Насарэнко олон нийтэд мэдээлэл өглөө. Тэрбээр мансуурсан үедээ тээврийн хэрэгсэл жолоодох нь нийгэмд аюултай ноцтой гэмт хэрэг болохыг онцлоод, Бритни Спирс өөрийн үйлдсэн хэргийн хариуцлагыг бүрэн хүлээхэд бэлэн байгааг тэмдэглэсэн юм. Мөн шүүхээс тогтоосон шаардлагуудыг чанд дагаж мөрдөх нь түүний хувьд хамгийн чухал алхам гэдгийг прокурор санууллаа.
Шүүхтэй байгуулсан тохиролцооны дагуу поп од Бритни Спирс мансууруулах бодисоос гарах эмчилгээндээ үргэлжлүүлэн хамрагдах үүрэг хүлээж байна. Түүнчлэн тэрбээр долоо хоног бүр сэтгэл зүйчийн зөвлөгөө авч, сар бүр сэтгэцийн засалч дээр очиж хянуулах шаардлагатай болжээ.
