Хөлбөмбөгийн супер од Криштиану Роналду өөрийн оролцоотойгоор бүтээж буй Их Британийн хөлбөмбөгийн тухай олон ангит киноны үйлдвэрлэл албан ёсоор эхэлснийг зарлалаа.
Өнгөрсөн долдугаар сард өдгөө 41 настай хөлбөмбөгчин эр зохиомол хөлбөмбөгийн агентын тухай өгүүлэх тус цувралын гүйцэтгэх продюсероор ажиллах болсон нь тодорхой болсон юм. Гол дүрийн агентын дүрийг жүжигчин Дэмиан Льюис бүтээх аж. Уг цуврал дээр Роналдугийн нэрт продюсер Мэттью Вонтой хамтран удирддаг “UR•Marv Studios” студи ажиллаж байна.
Зураг авалтад Криштиану Роналдугаас гадна Францын шигшээ багийн довтлогч асан Тьерри Анри мөн оролцох юм байна.
Өнөөдөр Роналду өөрийн Instagram хуудаснаа зураг авалтын талбайн агшнууд болон Мэттью Вонтой хамт авахуулсан гэрэл зургаа нийтэлжээ. Тэрээр зургийнхаа тайлбарт: «Гайхалтай мэдээ! Миний анхны олон ангит кино болох “Day 1s”-ийн үйлдвэрлэл эхэллээ. Бүх дэлгэрэнгүй мэдээллийг удахгүй хүргэнэ» хэмээн бичсэн байна.
