Өнөөдөр буюу арваннэгдүгээр сарын 12-нд Баян-Өлгий, Ховд аймгийн ихэнх нутгаар нойтон цас, цас орж, цасан шуурга шуурахыг Цаг уур, орчны шинжилгээний газраас анхаарууллаа. Үүний улмаас баруун аймгуудын зам, даваа, гүвээнд үзэгдэх орчин муудаж, халтиргаа гулгаа үүсэх эрсдэлтэй байна.
Цаг уурын урьдчилсан мэдээгээр, баруун аймгуудын нутгийн баруун хэсгээр үүлшиж, Баян-Өлгий, Ховдын ихэнх нутаг, Увсын өмнөд, Завханы баруун сумдаар 0.2-9.0 мм хэмжээтэй нойтон цас, цас орох төлөвтэй байна. Харин бусад нутгаар багавтар үүлтэй, цас орохгүй.
Алтайн уулархаг нутгаар салхи секундэд 14 метр хүрнэ
Баруун аймгуудын баруун хэсгээр салхины чиглэл баруун өмнөөс баруун хойш эргэх бол бусад нутгаар баруун өмнөөс секундэд 5-10 метрийн хурдтай салхилна. Өдрийн цагаар Алтайн уулархаг нутгаар салхи ширүүсэж, секундэд 12-14 метр хүрэх төлөвтэй байгаа аж.
Цасан шуурганы улмаас замын хөдөлгөөнд оролцогчдын үзэгдэх орчин хязгаарлагдаж, даваа, гүвээнд халтиргаа гулгаа үүсэж болзошгүйг цаг уурын байгууллагаас сэрэмжлүүлжээ.
Зарим нутгаар 7 градус хүйтэн байна
Өнөөдрийн агаарын температур бүс нутгуудад харилцан адилгүй байх төлөвтэй байна. Тухайлбал, Завхан болон Заг-Байдраг голын эхээр -2…-7 градус хүйтэн байх бол Дархадын хотгор, Монгол-Алтайн уулархаг нутаг, Идэр, Тэс голын хөндийгөөр -2…+3 градус байна.
Харин говийн бүс нутгийн өмнөд хэсгээр +10…+15 градус, бусад нутгаар +4…+9 градус дулаан байх төлөв гарчээ.
Улаанбаатарт цас орохгүй, 6-8 градус дулаан байна
Нийслэл Улаанбаатар хот орчмоор өнөөдөр үүл багасаж, цас орохгүй. Салхи баруунаас секундэд 3-8 метрийн хурдтай салхилж, өдөртөө +6…+8 градус дулаан байхыг ЦУОШГ-аас мэдээллээ.
