2025 оны арваннэгдүгээр сарын 14-ний өдөр Замын Үүд олон улсын боомтоор урд хөрш рүү их хэмжээний алт хууль бусаар нэвтрүүлэх гэж байсан зохион байгуулалттай бүлэг этгээдийн үйлдлийг Тагнуулын байгууллага илрүүлж, таслан зогсоосон байна.
Энэ хэргийг Монгол болон гадаадын иргэд хамтран үйлдсэн байж болзошгүй бөгөөд тэднийг одоогоор саатуулан шалгаж байгаа аж. Албаныхан хэргийг “төрийн хяналтыг зөрчин, улсын эдийн засагт хохирол учруулахуйц ноцтой үйлдэл” гэж тодорхойлжээ.
Баялгийн хулгайтай тэмцэх ажлын хэсгийн хүрээнд
Энэхүү ажиллагаа нь Ерөнхий сайд Г.Занданшатараас 2025 оны аравдугаар сарын 29-нд байгуулсан “Баялгийн хулгайтай тэмцэх тусгай ажлын хэсэг”-ийн хүрээнд хэрэгжиж буй арга хэмжээний нэг хэсэг юм. Тэр үеэр Ерөнхий сайд төрийн байгууллагуудад бэлэн мөнгөний урсгалд тавих хяналтыг чангатгах, хууль бус экспорт, санхүүгийн гэмт хэргийн илрүүлэлтийг нэмэгдүүлэх үүрэг өгсөн байдаг.
Валютын хууль бус урсгалтай холбоотой хэрэг илрүүлжээ
Сүүлийн үед хууль хяналтын байгууллагууд эдийн засгийн ноцтой гэмт хэргүүдийг илрүүлсээр байгаа бөгөөд өнгөрсөн долоо хоногт зохион байгуулалттайгаар их хэмжээний валют хилээр гаргадаг байсан бүлэг этгээдүүдийг мөн саатуулжээ.
Урьдчилсан байдлаар уг бүлэг нь нэг удаад 2–3 сая ам.доллар гадагш гаргадаг байсан бөгөөд өнгөрсөн хугацаанд нийтдээ 700 тэрбум төгрөгтэй тэнцэх хэмжээний валютыг Монгол Улсаас гаргасан болохыг тогтоосон байна.
Эдийн засгийн хяналтыг чангатгах шаардлага
Алт болон валютын хууль бус урсгал нь улсын эдийн засгийн аюулгүй байдалд сөргөөр нөлөөлж байгаа тул холбогдох байгууллагууд хяналт шалгалтаа улам чангатгаж, ийм төрлийн гэмт хэргийг илрүүлэх ажиллагааг эрчимжүүлээд байна.
