Сүүлийн өдрүүдэд сошиал орчинд өрнөж буй “Монгол хаан” жүжигтэй холбоотой мэдээлэл улс төрийн халуун сэдэв болоод байна. Энэхүү маргааныг УИХ-ын гишүүн Б.Энхбаяр эхлүүлж, “Эрдэнэс Оюу толгой” ХХК Их Британийн “Atticus Partners” компанитай 7 тэрбум төгрөгөөр хамтран ажиллаж, уг мөнгөөр “Монгол хаан” жүжгийг сурталчилсан гэж мэдэгдсэн юм.
“Atticus Partners” ба төрийн байгууллагуудын нэр дурдагдсан нь
Хариуд нь “Atticus Partners” компанийн зүгээс албан мэдэгдэл гаргаж, өөрсдийгөө “Рио Тинто”-той хэлэлцээ хийж, “Самурай” бондын эргэн төлөлт зэрэг асуудалд оролцож байсан хэмээн тайлбарласан. Тэд мөн Гадаад харилцааны яам, Сангийн яам, “E-Mongolia” платформтой хамтран ажилласан гэж мэдэгдэлдээ дурджээ.
Гэвч удалгүй Гадаад харилцааны яам болон “E-Mongolia” платформ тус тус эсрэг байр суурь илэрхийлж, “Atticus Partners”-тай ямар нэгэн байдлаар хамтран ажиллаагүй гэдгээ албан ёсоор мэдэгдсэн байна.
Сошиал дахь улс төрийн зөрчил ба төрийн оролцоо
Монголын улс төрийн сөргөлдөөн сүүлийн үед сошиал орчинд баримт нэртэй мэдээлэл тарааж, талууд өөрийн өнцгөөр тайлбарлах хэлбэрт орсон. Хуулийн байгууллагуудын дүгнэлт, баталгаатай мэдээлэл ховор байх тул иргэдийн итгэл төөрөгдөөнд ордог.
Энэ удаагийн маргаан ч мөн Ерөнхий сайд Г.Занданшатар болон УИХ-ын дарга Д.Амарбаясгалан нарын улс төрийн зөрчилтэй холбон тайлбарлагдаж байна. Сошиалд тэдний нэрсийг “Бортээг”, “нүүрс”, “Хэро” Б.Баатар, А.Амундра зэрэг сэдвүүдтэй холбон тарааж байгаа нь нэг хэвийн зүй тогтол болжээ.
Төрийн байгууллагууд улс төрийн хэрүүлд татагдах аюул
Энэ бүхний дунд төрийн яам, агентлагууд өөрийн ажлаа хийхийн оронд сошиал дахь “үнэн худал нь тодорхойгүй” маргаанд оролцож мэдэгдэл гаргах нь хэвийн үзэгдэл болж эхэллээ.
- Гадаад харилцааны яам – улс төрийн сэдэвт нэр дурдагдсаны дараа мэдэгдэл гаргав.
- “E-Mongolia” платформ – анхнаасаа төрийн үйлчилгээний цахим систем байсан ч улс төрийн маргаанд татагдан орсон.
Гадаад харилцааны сайд Б.Батцэцэг Ерөнхий сайд Г.Занданшатарын талд хамаарах гэж үзэх байр суурь ч ажиглагдаж байна. Энэ байдал нь төрийн байгууллагуудыг улс төрийн талцлын нэг хэсэг болгох эрсдэлийг нэмэгдүүлж байгаа юм.
Улс төр, төр хоёрын зааг бүдгэрэв
Хэрэв төрийн байгууллагууд сошиал дахь улс төрийн “дайнд” оролцож, үнэн бодит байдлыг бус цахим маргаанд хариу өгдөг бол энэ нь хууль бус хүн засагладаг тогтолцоо руу шилжиж байгаагийн дохио юм. Төрийн үүрэг бол хуулийн дагуу ажиллах, албан ёсны эх сурвалжаар мэдээлэл түгээх болохоос биш сошиал маргаанд оролцох биш.
