Попын хаан хэмээгддэг агсан Майкл Жексон 1990-ээд оны сүүлчээр Францын Ним хотод тоглолт хийхдээ өмсөж байсан өрөөсөн оймс Лхагва гарагт 7688 еврогоор, буюу ойролцоогоор $8,800-аар зарагджээ. Энэхүү ховор дурсгалын зүйл нь олон жилийн турш хувийн хадгалгаанд байсан бөгөөд дуудлага худалдаагаар хоёр дахин өндөр үнээр борлуулагдсан байна.
Оймсыг анх 1997 оны долдугаар сард Ним хотын тоглолтын дараа нэг техникч Жексоны хувцас солих өрөөний ойролцоо хаягдсан байдлаар олж авч хадгалжээ. Жексон тухайн тоглолтын үеэр гялалзсан шигтгээтэй, цагаан өнгийн спорт оймс өмсөж байсан бөгөөд энэ нь түүний алдарт “Billie Jean” дууны клипэнд өмсдөг оймстой төстэй байсан гэдэг.
Дуудлага худалдааны вебсайт дээр мэдээлснээр, олон жилийн элэгдэлд орсны улмаас оймсонд толбо тогтсон бөгөөд шигтгээнүүд нь шарлажээ. Анхны үнэлгээгээр 3,000-4,000 еврогийн хооронд үнэлэгдэж байсан энэхүү эд зүйл ийнхүү хүлээлтээс давсан үнэ хүрсэн нь Жексоны нэр хүнд, түүхэн үнэ цэнэ одоо ч өндөр байгааг харуулж байна.
Майкл Жексоны хэрэглэж байсан эд зүйлсийн үнэ жил ирэх тусам өссөөр байгаа. Тухайлбал, 2009 онд Макаогийн нэг казино түүний анхны “moonwalk” бүжгийн үеэр (1983 он) өмссөн бээлийг $350,000-аар худалдан авсан бол 2023 онд Парисын дуудлага худалдаагаар түүний өмсөж байсан малгай $80,000-ын үнэ хүрч байжээ.
Майкл Жексон 2009 онд мансууруулах бодисын тун хэтрүүлсний улмаас 50 насандаа таалал төгссөн ч түүний урлагийн өв, дурсамж өнөөдөр ч шүтэн бишрэгчдийнх нь дунд үнэ цэнтэй хэвээр үлджээ.
