Зам, тээврийн хөгжлийн яам Монгол Улсын иргэний агаарын тээврийн салбарт шинэ хуудас нээгдсэнийг албан ёсоор мэдэгдлээ. Өнөөдөр “Hunnu Air” агаарын тээврийн компани БНСУ-ын Чхонджу хотоос Хөвсгөл аймгийн Мөрөн чиглэлд анхны олон улсын шууд нислэгээ үйлдсэн нь түүхэн үйл явдал боллоо.
Мөрөн нисэх буудал олон улсын зэрэглэлд хүрлээ
Монгол Улсын Засгийн газрын хэрэгжүүлж буй Нислэгийн либералчлалын бодлогын хүрээнд Мөрөн нисэх онгоцны буудлыг Олон улсын иргэний нисэхийн байгууллагын (ICAO) 4С ангилалд багтаах шинэчлэл хийгдсэн. Ингэснээр тус буудал нь олон улсын тогтмол болон захиалгат нислэг хүлээн авах чадамжтай болсон байна.
Зам, тээврийн хөгжлийн яамны зүгээс орон нутгийн нисэх буудлуудын дэд бүтцийг үе шаттайгаар шинэчилж, 4С ангилалд хүргэх ажлыг хэрэгжүүлснээр зөвхөн агаарын тээврийн сүлжээг өргөтгөхөд биш, бүс нутгийн эдийн засаг, аялал жуулчлалын хөгжилд ч бодитой хувь нэмэр оруулж эхэлжээ.
Шууд нислэгийн ач холбогдол
Цаашид Мөрөн нисэх буудал ОХУ, БНХАУ, Япон, БНСУ болон Зүүн өмнөд Азийн орнуудаас шууд нислэг хүлээн авах боломжтой боллоо. Шинжээчдийн үзэж байгаагаар Улаанбаатарт төвлөрсөн нислэгийг хуваарилж, бүс нутгийн нислэгийг идэвхжүүлснээр аялал жуулчлалын салбарт томоохон дэмжлэг үзүүлж, олон улсын жуулчид шууд Мөрөнд буух нөхцөл бүрдэх нь цаг хугацаа, зардлыг хэмнэх чухал боломж юм.
Нислэгийн үзүүлэлтүүд
Шинэ чиглэлийн нислэгийг “Hunnu Air” компанийн Embraer-190 загварын, 98 хүний суудалтай онгоц гүйцэтгэсэн бөгөөд нислэгийн хугацаа 4 цаг 10 минут үргэлжилжээ.
