Улс төрийн намын тухай хуулийн шинэчилсэн найруулгыг хэрэгжүүлэх хүрээнд намууд 2025 оны арванхоёрдугаар сарын 31-ний дотор шинэчилсэн дүрмээ Улсын дээд шүүхэд (УДШ) хүргүүлэх үүрэг хүлээсэн.
2025 он гарснаас хойш ШИНЭ нам, Монголын ногоон нам шинэ дүрмээ УДШ-д хүргүүлсэн талаар өмнө нь мэдээлж байсан бол парламентад суудалтай намуудаас ИЗНН манлайлж, гуравдугаар сарын 10-ны өдөр шинэ дүрмээ бүртгүүлэх хүсэлтээ өгчээ.
ИЗНН-ын улс төрийн байр суурь
2024 оны УИХ-ын сонгуулиар бүрдсэн парламент МАН, АН, ХҮН, ИЗНН, Үндэсний эвсэл гэсэн таван намаас бүрдсэн. Эдгээрээс ИЗНН Улсын дээд шүүхэд бүртгэлтэй эхний дөрвөн намын нэг бөгөөд парламентад гурван төлөөлөлтэй байна.
Намуудын дүрэм шинэчлэлийн хуулийн хугацаа сунгагдсан шалтгаан
Жижиг намууд шинэ дүрмээ хугацаанд нь хүргүүлэх боломжгүй гэж үзэж, тодорхой хугацаа шаардан хүсэлт гаргасан тул хуулийн хэрэгжилтийг 2025 оны 12-р сарын 31 хүртэл сунгасан. Гэвч шүүмжлэл гарч, энэ өөрчлөлт нь эрх баригч гурван намын ашиг сонирхлыг хамгаалсан шийдвэр байж магадгүй гэж хардах хүмүүс цөөнгүй байна.
Гэсэн ч “Амжихгүй байна” гэсэн жижиг намууд дүрмээ хугацаанаас нь өмнө хүргүүлж, парламентад суудалтай намуудын олонх нь идэвхтэй алхам хийхгүй байгаа нь анхаарал татаж байна. Энэ нөхцөлд ИЗНН парламентад суудалтай намуудаас анхлан дүрмээ хүргүүлснээр манлайлал үзүүлэв.
