Нийслэлийн Сонгинохайрхан дүүргийн Засаг дарга Ц.Баттөрийг үүрэгт ажлаас нь чөлөөлж, түүний оронд Нийслэлийн иргэдийн Төлөөлөгчдийн Хурлын төлөөлөгч Д.Ундармааг томилох саналыг 100 хувийн саналаар дэмжсэн байна.
Д.Ундармаа нь өмнө нь тус дүүргийн Засаг даргын орлогч, зөвлөх болон хорооны Засаг даргаар ажиллаж байсан туршлагатай. Тэрбээр боловсролын салбарт ажлын гараагаа эхлүүлж, улмаар төрийн захиргаа, орон нутгийн удирдлагын байгууллагуудад ажиллажээ.
Багш мэргэжилтэй, нийгмийн удирдлагын чиглэлээр суралцжээ
Д.Ундармаа 1985-1995 онд ерөнхий боловсролын 76 дугаар дунд сургуульд суралцсан байна. Үүний дараа 1996-1998 онд Багшийн сургуульд бага ангийн багш, 1998-2000 онд Улаанбаатарын их сургуульд математикийн багш мэргэжлээр тус тус суралцжээ.
Мөн 2001-2003 онд Удирдлагын академид суралцаж, нийгмийн удирдлагын менежерийн боловсрол эзэмшсэн байна.
Орон нутгийн удирдлагын байгууллагад олон жил ажилласан туршлагатай
Д.Ундармаа 1995-1996 онд ерөнхий боловсролын 76 дугаар сургуульд багшилж, 1996-1999 онд 127 дугаар цэцэрлэг, сургуулийн цогцолборт багшаар ажиллажээ.
Тэрбээр 1999-2001 онд Сонгинохайрхан дүүргийн 11 дүгээр хорооны Засаг даргаар ажилласан бол 2001-2008 онд “Автобус-3” НӨҮГ-ын Захиргаа, хүний нөөцийн албыг удирдсан байна.
Үүний дараа 2008-2018 онд тус дүүргийн 11 дүгээр хорооны Засаг даргаар дахин ажиллаж, 2018-2020 онд Сонгинохайрхан дүүргийн Засаг даргын орлогчийн албыг хашжээ.
Мөн 2020-2022 онд дүүргийн Засаг даргын зөвлөхөөр ажилласан бөгөөд 2022 оноос Засаг даргын орлогчоор ажиллаж байсан юм.
Ийнхүү Сонгинохайрхан дүүргийн Засаг даргын албан тушаалд Д.Ундармааг томилох саналыг 100 хувийн дэмжлэгтэйгээр шийдвэрлэсэн байна.
