“Хар сарнай” хамтлагийн 35 жилийн ойн хүрээнд зохион байгуулагдахаар товлогдсон “Golden Hits” тоглолт энэ сарын 24-нд болох байсан ч цуцлагдсаныг албан ёсоор мэдэгдлээ.
Тоглолт яагаад цуцлагдсан бэ?
Сүүлийн үед Монголын рок, поп, хип хоп урлагийн ертөнцөд тохиосон уй гашуу, эмгэнэлт үйл явдлуудтай холбоотойгоор хамтлаг энэ шийдвэрийг гаргасан байна.
С.Амармандахын мэдэгдэл:
Хамтлагийн ахлагч С.Амармандах өөрийн фэйсбүүк хуудсандаа дараах мэдэгдлийг нийтэлжээ:
“Агуу урлагийн алтан тайзнаа тодоос тод гэрэлтэж, хөгжим, хөг эгшгийн дээдээр монгол түмнийг уярааж, ухааруулж, омогшуулж, бахархуулж ирсэн “Харанга” хамтлагийн ахлагч, Монгол Улсын Төрийн соёрхолт, Гавьяат жүжигчин Ц.Энхманлай эрхэм ах минь таалал төгсөж, бидэнд үгээр хэлж дийлэмгүй их уй гашуу тохиолоо.
Монгол Улсын Урлагийн гавьяат зүтгэлтэн Б.Долгион, Монгол Улсын Соёлын гавьяат зүтгэлтэн И.Болоож, “Madness” хамтлагийн дуучин Ч.Оюунсайхан, “Icetop” хамтлагийн ахлагч EyesCool Б.Оргил-Эрдэнэ нарын олон хайрт ахан, дүүс минь энэ богино хугацаанд та биднийг үүрд орхин одлоо.
Монголын урлагт тохиосон энэ харамсалт уй гашууг хуваалцаж, тэднийхээ гэр бүл, төрөл төрөгсдийг хүндэтгэн, мэхийн ёслох үүднээс “Хар сарнай” хамтлаг 2025.05.24-нд тоглогдох байсан тоглолтоо албан ёсоор цуцалж буйгаа үүгээр мэдэгдэж байна.”
Тоглолтыг цуцлах шалтгаан:
- Монголын урлагийн олон алдартнууд богино хугацаанд таалал төгссөн
- Урлагийн ахмадуудын дурсгалыг хүндэтгэх
- Гэр бүл, ойр дотны хүмүүсийн уй гашууг хуваалцах
