Хорих байгууллагын удирдах албан тушаалтнууд хоригдлуудыг хувийн зориулалттай барилгын ажилд үнэ төлбөргүй дайчилсан гэх мэдээлэл олон нийтэд тархаад байна. Үүнтэй холбоотойгоор Шүүхийн шийдвэр гүйцэтгэх байгууллага хоригдлын хөдөлмөр эрхлэлт ямар нөхцөл, журмаар явагддаг талаар тайлбар гаргажээ.
Тус байгууллагын мэдээлснээр хоригдлыг дур мэдэн хорих ангиас гадуур ажиллуулах, эсвэл хийсэн хөдөлмөрт нь хөлс олгохгүй байх эрх зүйн боломжгүй аж. Хорих ангиас гадуурх хөдөлмөр эрхлэлтийг гэрээ, хяналт болон шаардлагатай тохиолдолд прокурорын зөвшөөрөлд үндэслэн зохион байгуулах ёстой гэж мэдэгдсэн байна.
Цалинтай ажлын байрны тоог нэмэгдүүлэх зорилт тавьжээ
Засгийн газрын 2024-2028 оны үйл ажиллагааны хөтөлбөрийг хэрэгжүүлэх төлөвлөгөөнд хоригдлуудын цалинтай ажлын байрны хамрагдалтыг 30 хувьд хүргэх зорилт тусгагдсан байна. Үүний хүрээнд ШШГЕГ хорих ял эдэлж буй хүмүүсийг ажлын байраар хангах ажлыг үе шаттай хэрэгжүүлж байгаа гэж тайлбарлажээ.
Хөдөлмөр эрхэлсэн хоригдолд цалин олгохоос гадна хуульд заасан нөхцөлөөр шагналын хоног тооцох, гэмт хэргийн улмаас бусдад учруулсан хохирол, төлбөрийг барагдуулахад орлогыг нь ашиглах боломжтойг мөн дурдсан байна. Байгууллагын тайлбараар эдгээр ажлыг гэрээ болон холбогдох хяналтын дор хэрэгжүүлдэг аж.
Хуулиар хөдөлмөр эрхлэлтийн нөхцөлийг тусгайлан зохицуулжээ
Шүүхийн шийдвэр гүйцэтгэх байгууллага тайлбартаа Шүүхийн шийдвэр гүйцэтгэх тухай хуулийн холбогдох заалтуудыг эш татсан байна.
“Шүүхийн шийдвэр гүйцэтгэх тухай хуулийн 214.6. “Нээлттэй хорих ангийн хоригдлыг хорих байгууллага өөрийн болон өөрийн хувь нийлүүлсэн, хамтарсан хуулийн этгээдэд, бусад хуулийн этгээдтэй гэрээ байгуулан зохих хяналттайгаар хөдөлмөрлүүлж болно”
Мөн хуулийн 217.1-д “Нээлттэй хорих ангид ял эдэлж байгаа хорих ялын 50-иас дээш хувийг эдэлсэн хоригдлыг харуул хамгаалалтгүй, 50-иас доош хувийг эдэлсэн хоригдлыг хорих ангийн өөрийн үйлдвэрлэл болон хорих ангиас гадуур прокурорын зөвшөөрлөөр гэрээний үндсэн дээр харуул хамгаалалттай хөдөлмөрлүүлж болно” гэж заасныг дурджээ.
Тус байгууллагын тайлбараар дээрх зохицуулалтын дагуу хоригдлыг гэрээний үндсэн дээр ажиллуулахдаа хөдөлмөрийн хөлсний доод хэмжээнээс багагүй цалин олгох ёстой байна.
Прокурорын байгууллага асуудлыг шалгаж байна
Хорих ангиудын өдөр тутмын үйл ажиллагаанд прокурор болон Хүний эрхийн үндэсний комисс хяналт тавьдаг гэж ШШГЕГ мэдэгджээ. Ийм хяналтын тогтолцооны хүрээнд алба хаагч, удирдлагын зүгээс хоригдлыг зөвшөөрөлгүйгээр гадуур гарган ажиллуулах, эсвэл цалингүй хөдөлмөрлүүлэх боломжгүй гэсэн байр суурь илэрхийлсэн байна.
Олон нийтэд гарсан хоригдлуудаар хувийн барилгын ажил хийлгэсэн гэх мэдээлэлтэй холбоотой асуудлыг прокурорын байгууллага шалгаж эхэлжээ. Шалгалтын эцсийн дүн одоогоор танилцуулагдаагүй байна.
