Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг (КОП17) зохион байгуулах Үндэсний хорооноос бэлтгэл ажлын явц, гадаадын төлөөлөгчдийн бүртгэл болон цаашид хэрэгжүүлэх ажлуудын талаар хэвлэлийн бага хурал хийлээ.
Монгол Улс 2026 оны наймдугаар сарын 17-ноос 28-ны өдрүүдэд Улаанбаатар хотноо дэлхийн 197 улсын төлөөллийг хүлээн авч, газрын доройтол, цөлжилт болон гангийн асуудлаарх олон улсын хамгийн том, өндөр түвшний бага хурлыг эх орондоо зохион байгуулах гэж байна. Энэхүү хурал нь манай улсын байгаль орчны салбар дахь манлайлал, олон улсын хамтын ажиллагааг шинэ шатанд гаргах чухал ач холбогдолтой юм.
Бэлтгэл ажлын явц ба хурлын үеэр болох арга хэмжээнүүд
Одоогоор хурлын бэлтгэл ажил 82 хувийн гүйцэтгэлтэй үргэлжилж байгаа бөгөөд зохион байгуулалтын талаарх онцлох мэдээллүүдээс дурдвал:
- Оролцогчдын бүртгэл: Өнөөдрийн байдлаар 4,500 гаруй гадаадын төлөөлөгч оролцохоор бүртгүүлээд байгаа бөгөөд энэ тоо өдөр ирэх тусам нэмэгдэж байна.
- Тусгай болон онцлох арга хэмжээнүүд: Хуралдааны үеэр өндөр дээд түвшний уулзалт, сайд нарын хэлэлцүүлгээс гадна “Business4Land”, “Fashion4Land” зэрэг олон улсын тусгай хөтөлбөрүүд болон Ногоон бүсийн олон нийтэд зориулсан үйл ажиллагаанууд зохион байгуулагдана.
- Стратегийн ач холбогдол: Нүүдлийн соёл иргэншил, газрын тогтвортой менежментийн туршлагыг дэлхийд таниулах, ногоон хөрөнгө оруулалт болон олон улсын түншлэлийг өргөжүүлэх боломжийг нээнэ.
Үндэсний хорооны Ажлын албанаас хурлын бэлтгэл ажлын талаар олон нийт болон хэвлэл мэдээллийн байгууллагуудад тогтмол, нээлттэй мэдээлэл хүргэн, КОП17 бага хурлыг амжилттай зохион байгуулахын төлөө бүх талын хамтын ажиллагааг ханган ажиллаж байна.
