Холливудын жүжигчин Жан-Клод Ван Дамм өмнө нь Украиныг дэмжиж байсан ч Путиныг “найз” хэмээн дурдсан мэдэгдлийн дараа маргааны төвд орлоо.
Саяхан тэрбээр Хонконгт өөрийн уран бүтээлийн үзэсгэлэнгийн нээлтэд оролцож, South China Morning Post хэвлэлд ярилцлага өгчээ. Ярилцлагын үеэр гэнэтийн байдлаар ОХУ-ын ерөнхийлөгчийг дурдсан нь олон нийтийг гайхшруулсан. Учир нь Ван Дамм өмнө нь Украинд нээлттэй дэмжлэг үзүүлж байсан бөгөөд 2022 онд тус улсад очиж, украинчуудтай эв санааны нэгдлээ илэрхийлж байв. Харин одоогийн мэдэгдэл нь түүний байр суурь хоёрдмол харагдуулах болов.
Жүжигчин “сайн найз” хэмээн тодорхойлсон ОХУ-ын ерөнхийлөгч Владимир Путины үгийг эш татаж, өөрийн олон улсын алдар нэрийг “үйлдэл үгнээс илүү чанга ярьдаг” гэдгээр тайлбарласан гэжээ. Түүний хэлснээр энэ үг “Украинд дайн эхлэхээс өмнө, мөн Америк, Орос, Хятадын хооронд зөрчил үүсэхээс өмнө” хэлэгдсэн байна.
Энэ нь жүжигчний хувьд Кремлийг дэмжсэн анхны тохиолдол биш юм. Өмнө нь тэрбээр оргон зайлсан экс-ардын депутат Александр Онищенкотой хамт видео бичлэг хийж, Путины хандсан үг хэлж байв. Тэр бичлэгтээ Ван Дамм ОХУ-д очих хүсэлтэй байгаагаа илэрхийлж, Сочид спортын арга хэмжээний үеэр болсон уулзалтаа найрсаг өнгө аясаар дурдсан байдаг.
Эдгээр мэдэгдэл нь түүний өмнөх олон нийтийн үйлдлүүдтэй огцом зөрчилдөж байна. Үүний улмаас цахим орчинд өргөн хэлэлцүүлэг өрнөж, түүний байр суурийн тогтвортой байдалд эргэлзээ төрүүлэв. Учир нь бүрэн хэмжээний халдлага эхэлсний дараа Ван Дамм Украинд очиж, украин ард түмнийг дэмжиж байсан билээ.
