Цаг уур, орчны шинжилгээний газраас гаргасан сүүлийн үеийн мэдээллээр Монгол орны нийт нутаг дэвсгэрийн 65 хувьд цасан бүрхүүл тогтоод байна. Одоогоор цасны дундаж зузаан 7.5 см-т хүрсэн бөгөөд нийт цасан дахь усны нөөц 14.2 шоо км-ээр хэмжигдэж байгаа юм.
Гол мөрний сав газруудын цасжилт болон усны нөөцийн байдлыг авч үзвэл:
- Ерөө, Хараа, Туул, Хэрлэн, Онон, Сэлэнгэ мөрөн болон Халх голын сав газруудын 90-99 хувь нь цастай байгаа бөгөөд цасан дахь усны нөөц нь дунджаар 0.59 шоо км байна.
- Орхон, Дэлгэрмөрөн, Чулуут, Завхан, Хануй болон Ховд голын сав газрын 45-80 хувь нь цасан бүрхүүлтэй байгаа ба усны нөөц нь дунджаар 0.51 шоо км орчим байна.
Цаг агаар дулаарч буйтай холбоотойгоор дээрх бүс нутгуудад шар усны үер буух бодит аюул нүүрлэж байгааг албаныхан онцгойлон анхааруулж байна. Ялангуяа өвөлжилт хүндэрсэн газруудын гуу жалганд хаягдсан малын сэг зэм цасны усаар дамжин гол мөрөн бохирдуулах, халдварт өвчин тараах эрсдэл маш өндөр байгаа юм. Иймд холбогдох байгууллагууд болон иргэд гуу жалганд байгаа сэг зэмийг яаралтай цэвэрлэж, устгал, ариутгал халдваргүйжүүлэлтийг цаг алдалгүй хийх шаардлагатайг зөвлөж байна.
Хаврын шар усны үер жил бүр асуудал болдог шүү