Эрин зууны бахархал болсон Эрдэнэт хотын түүхт 50 жилийн ой болон аймгийн Засаг даргын үйл ажиллагааны мөрийн хөтөлбөрийн хүрээнд нэгэн онцлох үйл явдал тохиож байна. Тус хотоос төрөн гарсан спортын алдартнуудаа алдаршуулах, тэдний залгамж халааг бэлтгэх зорилгоор орон нутгийн удирдлагууд нэрэмжит тэмцээнүүдийг цувралаар зохион байгуулж байгаа юм.
Үүний нэг болох Монгол Улсын гавьяат тамирчин, Олимпын наадмын хүрэл медальт Доржпаламын Нармандахын нэрэмжит өсвөр үе, залуучууд, насанд хүрэгчдийн олон хотын аварга шалгаруулах тэмцээн өнөөдөр Эрдэнэт хотноо хөшгөө нээж байна. Энэхүү тэмцээн нь олон хотын тамирчдыг нэг дор цуглуулж, ур чадвараа сорих боломжийг олгож байгаагаараа онцлогтой.
Д.Нармандах нь 1996 оны Атлантагийн олимпоос хүрэл медаль хүртэж, Монголын жүдо бөхийн түүхэнд нэрээ мөнхөлсөн тамирчин билээ. Тэрбээр Ази тивийн аварга шалгаруулах тэмцээнээс мөнгө, хүрэл медаль хүртэж байснаас гадна Дэлхийн аваргын тэмцээнд тавдугаар байрт шалгарч байсан амжилттай. Түүний жүдо бөхийн спортод оруулсан хувь нэмрийг үнэлж, олон нийт түүнийг Зууны манлай жүдоч хэмээн өргөмжилдөг билээ.
