Монгол Улсын Ерөнхийлөгч Ухнаагийн Хүрэлсүх Орхон аймагт ажиллаж, тус аймгийн иргэдтэй уулзалт хийлээ. Түүнийг аймгийн төв талбайд Эрдэнэт цэргийн хүрээний хүндэт харуул угтан авсан бөгөөд Ерөнхийлөгч уулзалтын эхэнд Орхон аймгийн хөгжил, улс орны эдийн засагт оруулж буй жинтэй хувь нэмрийг онцлон тэмдэглэв.
Улс орны нийгэм, эдийн засгийн өнөөгийн байдал
Ерөнхийлөгч уулзалтын үеэр гадаад харилцаа, улсын нийгэм, эдийн засгийн өнөөгийн байдал болон хэрэгжиж буй үндэсний томоохон хөдөлгөөнүүдийн үр дүнг товч танилцууллаа.
Манай улсын эдийн засаг 6.8 хувиар өсөж, нэг хүнд ногдох Дотоодын нийт бүтээгдэхүүн 7,000 ам.доллар давсан бол гадаад валютын албан нөөц 7 тэрбум ам.долларт хүрч, 745 мянган тонн үр тариа, ургац хураан аваад байна. Мөн гадаад харилцаа өргөжиж, сүүлийн жилүүдэд 21 улсын төрийн тэргүүн Монгол Улсад айлчилсныг дурдлаа.
Үндэсний хөтөлбөрүүдийн онцлох үр дүнгүүд
Энэхүү нийгэм, эдийн засгийн ололт амжилтад Орхон аймгийн төр, захиргаа, хувийн хэвшил болон иргэдийн оролцоо өндөр байсныг Ерөнхийлөгч тэмдэглээд, дараах үндэсний хөтөлбөрүүдийн ахицыг танилцуулав:
- “Цагаан алт” хөтөлбөр: Самнасан ноолуурын экспорт 5 дахин өсөж, 330 сая ам.долларт хүрэв.
- “Хүнсний хувьсгал” хөдөлгөөн: 53 хүнсний үйлдвэр шинээр ашиглалтад орж, 1,000 гаруй нэр төрлийн бүтээгдэхүүнийг зах зээлд нийлүүлж байна.
- “Тэрбум мод” хөдөлгөөн: Улсын хэмжээнд 116 сая мод тарьж ургуулаад байна.
- “Ерөнхийлөгчийн илгээлт-2100” хөтөлбөр: 21 улсад 1,355 оюутан суралцаж байгаагаас 10 орчим нь Орхон аймгийн залуус бөгөөд АНУ, Герман, Хятад зэрэг оронд мэдээллийн технологи, инженерчлэл, биотехнологийн чиглэлээр суралцаж байна.
Ерөнхийлөгч цаашид эрчим хүч, нефтийн бүтээгдэхүүн, хүнс, цемент, ган, бордооны хэрэгцээгээ дотоодоосоо бүрэн хангаж, улмаар экспортлогч орон болох чухал зорилтыг онцоллоо. Мөн бүх шатанд сахилга хариуцлага, ёс зүйг чангатган, эв нэгдлийг эрхэмлэн эх орныхоо хөгжлийн төлөө хичээн зүтгэхийг уриаллаа.
