DJ Koo нэрээр олонд танигдсан Ку Жүн Ёп эхнэр, Тайванийн од Барби Хсүг алдсаны дараа амьдралдаа бага багаар эргэн төвлөрч эхэлсэн талаар түүний гэр бүлийнхэн мэдээлжээ.
Тайванийн хэвлэлүүдийн дамжуулснаар Барби Хсүгийн дүү, жүжигчин, телевизийн хөтлөгч Ди Хсү жилийн завсарлагааны дараа олны өмнө дахин гарч ирэх үеэрээ хүргэн ахыгаа дурссан байна. Тэрээр саяхан Dee’s Talk ток шоуны үндсэн хөтлөгчийн ажилдаа эргэн орж, нэгэн гоо сайхны брэндийн сурталчилгааны арга хэмжээний үеэр Ку Жүн Ёпийн талаар ярьжээ.
Ди Хсүгийн хэлснээр тэр одоо уран зурагт төвлөрч, зурсан бүтээлүүдээ гэр бүлийнхэндээ байнга илгээдэг болсон байна. “Тэр бүтээлээ явуулах бүрд би гайхдаг. Зураг бүрт нь Барбигийн харц, бүр сүнс нь хүртэл шингэсэн мэт санагддаг” хэмээн тэр хэлжээ. Мөн эдгээр бүтээл хэтэрхий үнэ цэнтэй, утга учиртай учраас зөвхөн гэр бүлийн хүрээнд үлдэх ёсгүй гэж боддогоо илэрхийлсэн байна. Тиймээс нэг өдөр түүнийг үзэсгэлэн гаргаж, хүмүүс Барби Хсүг түүний нүдээр харж чадна гэж найдаж байгаагаа ч хэлжээ.
Тэр мөн Ку Жүн Ёп гэр бүлийнхэнтэйгээ ойр байж, долоо хоног бүр хамтдаа хооллож байгаа тухай хуваалцсан байна. Ди Хсүгийн ярьснаар тэр аажмаар сэргэж байгаа бөгөөд “Одоо түүний нүдэнд илүү их гэрэл харагддаг болсон” гэжээ. Сүүлийн үед тэр дахин хошигнож, инээмсэглэж эхэлсэн нь ч гэр бүлийнхэнд нь багагүй тайвшрал өгч байгаа аж.
DJ Koo болон Барби Хсү нар анх 1998 онд Тайваньд танилцаж байсан бөгөөд хорь гаруй жилийн дараа дахин уулзан, 2022 онд гэрлэсэн юм. Тэдний эргэн учирсан түүх тухайн үед олны анхаарлыг ихэд татаж байв. Гэвч тэдний хамтын амьдрал удаан үргэлжлээгүй. Барби Хсү өнгөрсөн оны хоёрдугаар сард Японд гэр бүлийн аяллаар явах үеэрээ томуугийн хүндрэл, тэр дундаа уушгины үрэвсэл болон цусны халдварын улмаас нас барсан билээ.
