МУИС-ийн дэргэдэх Англи хэлний мэргэшлийн төвд энэ хичээлийн жилд давхардсан тоогоор 2400 гаруй багш, оюутан хамрагдаж, хэлний мэдлэгээ үнэ төлбөргүй дээшлүүлжээ. Тус төвийн өдөр тутмын үйл ажиллагаа болон сургалтын явцтай АНУ-ын Төрийн департаментын Зүүн Ази, Номхон далайн товчооны Төрийн нарийн бичгийн даргын орлогч Дэвид Вилозол тэргүүтэй албаны төлөөлөгчид өнөөдөр танилцсан байна. Энэхүү уулзалт нь АНУ-ын Тусгаар тогтнолын 250 жилийн ойн баярын арга хэмжээнүүдийн хүрээнд өрнөж буйгааараа онцлог юм.
Тус төвийг АНУ-ын Төрийн нарийн бичгийн дарга асан Энтони Блинкений санаачилсан “US-Mongolia English Initiative” хөтөлбөрийн хүрээнд байгуулж байжээ. Айлчлалын үеэр ноён Дэвид Вилозол төвийн гаргаж буй үр дүнг маш өндрөөр үнэлсэн байна. Түүнчлэн тэрбээр цаашид төвийн хүний нөөцийг бэхжүүлэх, материаллаг баазыг өргөжүүлэх болон санхүүгийн тусламжийг тогтвортой үргэлжлүүлэн олгохоо албан ёсоор илэрхийллээ.
Англи хэлний мэргэшлийн төв нь нийгмийн олон бүлэгт чиглэсэн хэлний цогц хөтөлбөрүүдийг нээлттэй хэрэгжүүлдэг байна. Тус байгууллагын зүгээс голлон анхаарч ажилладаг үндсэн чиглэлүүдэд дараах ажлууд багтдаг аж:
- Их, дээд сургууль болон ерөнхий боловсролын сургуулийн англи хэлний багш нарын мэргэжлийг дээшлүүлэх.
- Төрийн албан хаагчдын гадаад хэлний ур чадвар, харилцааны чадамжийг хөгжүүлэх.
