Улаанбаатар хот үүсэн байгуулагдсаны 387 жилийн ойг тохиолдуулан нийслэлийн түүх, соёлыг хадгалсан Улаанбаатар хотын музей үзмэрүүдээ иргэдэд дөрвөн өдрийн турш үнэ төлбөргүй үзүүлж эхэлжээ.
Музейн үнэгүй үйлчилгээг аравдугаар сарын 26-наас эхлүүлсэн бөгөөд энэ хугацаанд иргэд нийслэл хотын үүсэл хөгжил, түүхэн үйл явдалтай холбоотой ховор үзмэрүүдтэй танилцах боломжтой байна.
Харин 15-аас дээш хүнтэй баг, хамт олон музей үзэхээр төлөвлөж байгаа бол урьдчилан 11450960 дугаарт холбогдон захиалга өгөх шаардлагатайг музейн зүгээс мэдээлжээ.
1919 онд баригдсан түүхэн байшинд байрладаг
Улаанбаатар хотын музей Баянзүрх дүүрэгт, Бөхийн өргөөний зүүн талд байрладаг.
Одоогийн музейн барилгыг 1919 онд анх хувийн сууцны зориулалтаар барьсан байна. Харин 1956 оноос Улаанбаатар хотын музей тус байранд үйл ажиллагаагаа явуулж эхэлжээ.
Тус барилга өөрөө нийслэлийн түүхийн чухал гэрчдийн нэг юм. 1921 оны долоодугаар сард уг байшинд МАН-ын Төв хороо, Ардын түр Засгийн газар болон Цэргийн төв штаб байрлаж байжээ.
Мөн 1944-1953 онд Д.Сүхбаатарын музей энд ажиллаж байсан бол 1956 оноос хойш Улаанбаатар хотын музей тасралтгүй байрлаж байгаа аж.
3500 гаруй үзмэртэй ч 120 орчмыг нь дэлгэдэг
Улаанбаатар хотын музей 70 жилийн үйл ажиллагааныхаа хугацаанд 3500 гаруй үзмэр бүрдүүлсэн байна.
Эдгээрийн дотор нийслэлийн хот байгуулалт, ахуй амьдрал, түүхэн үйл явдал, соёлын өвтэй холбоотой олон үнэ цэнтэй эд өлгийн зүйлс хадгалагддаг.
Мөн өмнө нь олон нийтэд огт дэлгэн үзүүлж байгаагүй цор ганц ховор үзмэрүүд ч музейн сан хөмрөгт байдаг аж.
Гэсэн хэдий ч музейн байрны зай талбай хязгаарлагдмал учраас нийт 3500 гаруй үзмэрээс ердөө 120 орчмыг нь байнгын үзэсгэлэнд дэлгэн харуулдаг байна.
Иймээс нийслэлийн 387 жилийн ойн хүрээнд зохион байгуулж буй энэ удаагийн үнэ төлбөргүй үзвэр нь Улаанбаатар хотын түүх, соёлыг ойроос танин мэдэх сонирхолтой иргэдэд нээлттэй боломж болж байна.
