Монгол Улсын Гавьяат тамирчин Э.Цэндбаатар өнгөрсөн бямба гарагт Барбадосын боксчин Коби а Брийдиг буулган авч, мэргэжлийн боксын нэр хүндтэй холбоо болох Дэлхийн боксын зөвлөлийн (WBC) мөнгөн бүсний эзэн болсон билээ. Энэхүү ялалт нь түүний мэргэжлийн бокс дахь амжилтын буухиаг үргэлжлүүлж, чансаагаа ахиулахад чухал алхам болсон юм.
Тэрбээр аваргын бүсээ хамгаалах анхны тулаанаа ирэх дөрвөн сарын хугацаанд багтаан Монголдоо зохион байгуулах чин хүсэлтэй байгаагаа илэрхийллээ. Э.Цэндбаатар өөрийн цахим хуудсаараа дамжуулан энэ тухайгаа нийтлэхдээ: “Би World Boxing Council (WBC)-ийн мөнгөн бүс авсан. Одоо 120 хоногийн дотор хамгаалах ёстой. Тэр тулааныг Монголдоо хийх талаар ярилцаж байна. Хэрвээ зөвшөөрвөл Монголд хамгаална” хэмээсэн байна.
Хэрэв түүний энэхүү санал, хүсэлтийг мэргэжлийн боксын холбоо нь албан ёсоор хүлээн зөвшөөрвөл манай улсад спортын томоохон арга хэмжээ болохоос гадна Монголыг зорих гадаадын жуулчдын тоог нэмэгдүүлэх, эх орноо дэлхий дахинд сурталчлах нэгэн томоохон суваг болох ач холбогдолтой юм. Одоогоор талууд хэлэлцээрийн шатанд яваа бөгөөд Монголын бокс сонирхогчид аваргынхаа тулааныг эх орныхоо талбарт үзэх боломж бүрдэх эсэхийг амьсгаа даран хүлээж байна.
