УИХ-ын гишүүн, УИХ-ын дарга асан Д.Амарбаясгалан улсын хилээр гарахыг хязгаарлах таслан сэргийлэх арга хэмжээгээ өөрчлүүлэхээр шүүхэд дахин хандсан ч хүссэн шийдвэрээ гаргуулж чадсангүй. Тэрбээр энэ сарын 10-ны өдөр гаргасан хүсэлтээ өчигдөр буюу 2026 оны дөрөвдүгээр сарын 13-ны өдөр шүүхээр хэлэлцүүлсэн боловч шүүх бүрэлдэхүүн түүний “Хориг өөрчлөх зайлшгүй үндэслэл тогтоогдоогүй” хэмээн үзэж, хилийн хоригийг хэвээр үлдээжээ.
Авлигатай тэмцэх газраас түүнийг авлига, албан тушаалын хэрэгт холбогдуулан яллагдагчаар татан мөрдөн шалгах ажиллагааг үргэлжлүүлж байгаа юм. Тухайлбал, Д.Амарбаясгаланг дараах зүйл ангиудаар яллагдагчаар татаад байна:
- Эрх мэдэл, албан тушаалын байдлаа урвуулан ашиглах;
- Үндэслэлгүйгээр хөрөнгөжих;
- Нийтийн албан тушаалтан хахууль авах.
Шүүхийн энэхүү шийдвэрийг Д.Амарбаясгалан болон түүний өмгөөлөгчдийн зүгээс эс зөвшөөрч, Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн Ерөнхий шүүгчид дахин гомдол гаргаад байгаа аж. Өмнө нь ч мөн түүний хилийн хоригтой холбоотой гомдлыг Ерөнхий шүүгч хүлээж авахаас татгалзаж байсан бөгөөд энэ удаагийн гомдлыг хэрхэн шийдвэрлэх нь олны анхаарлыг татаж байна.
Түүний холбогдсон авлигын хэрэг улс төрийн хүрээнд ч хүчтэй нөлөө үзүүлж, МАН-ын дарга Н.Учрал түүнийг намын гишүүнчлэлээс чөлөөлөх санаачилга гаргаад буй. Хэдийгээр намын удирдлага түүнийг “хасах” процессыг эхлүүлсэн ч Говь-Алтай аймгийн МАН-ын хорооноос уг асуудлыг эргэн харах хүсэлтийг Хяналтын хороондоо хүргүүлсэн гэх мэдээлэл байна.
