Нийслэлийн авто замын хөдөлгөөнд Суррон, скүүтер, мопед болон цахилгаан дугуйтай иргэд маргааш буюу дөрөвдүгээр сарын 10-ны өдрөөс эхлэн албан ёсоор оролцож эхлэхээр боллоо. Замын хөдөлгөөний аюулгүй байдлыг хангах үүднээс холбогдох байгууллагуудаас эдгээр тээврийн хэрэгсэлд тавигдах шаардлагыг шинэчлэн тогтоосон байна.
Ялангуяа Суррон буюу бартаат замын цахилгаан дугуйг мотоциклийн ангилалд албан ёсоор хамааруулж, унах насны доод хязгаарыг 18 байхаар шийдвэрлэжээ. Ингэснээр тухайн тээврийн хэрэгслийг жолоодож буй иргэн заавал дараах шаардлагуудыг хангасан байх үүрэг хүлээж байна. Үүнд:
- Жолооч нь насанд хүрсэн буюу 18-аас дээш настай байх;
- “А” ангиллын жолоодох эрхийн үнэмлэхтэй байх;
- Тээврийн хэрэгсэл нь улсын бүртгэлийн дугаартай, хоёр талдаа тольтой байх;
- Хамгаалалтын малгай болон хувцас хэрэгслийг бүрэн өмсөж хэрэглэх.
Хэрэв дээрх заасан журмыг зөрчиж, шаардлага хангаагүй байдалтайгаар хөдөлгөөнд оролцвол Зөрчлийн тухай хуулийн дагуу тухайн иргэнийг 400,000 төгрөгөөр торгох хариуцлага хүлээлгэх юм. Иймд өөрийн болон бусдын амь нас, эрүүл мэндийг хамгаалж, замын хөдөлгөөндөө соёлтой, хариуцлагатай оролцохыг холбогдох албанаас сануулж байна. Аюулгүй байдлыг эрхэмлэн, дүрэм журмаа баримтлах нь хамгийн чухал болохыг анхаарна уу.
