Оросын долларын тэрбумтнуудын тоо түүхэн дэх хамгийн өндөр үзүүлэлтэд хүрлээ. Дэлхийн хамгийн баян бизнесменүүдийн жагсаалтад энэ жил Оросын 155 иргэн багтсан нь 2025 оны 146 хүн гэсэн өмнөх дээд амжилтыг эвдсэн байна.
“Forbes” сэтгүүлийн мэдээлснээр, Оросын баячуудын нийт хөрөнгийн хэмжээ ч мөн түүхэн дээд түвшинд буюу 696.5 тэрбум ам.долларт хүрчээ. Оросын тэрбумтнуудын жагсаалтыг “Северсталь” компанийг үүсгэн байгуулагч Алексей Мордашов шинээр тэргүүлж эхэлсэн бөгөөд түүний болон гэр бүлийнх нь хөрөнгө нэг жилийн дотор 37 тэрбум ам.доллар болж өсжээ. Энэхүү өсөлтөд алтны үнийн огцом өсөлт болон түүний эзэмшдэг “Nordgold” компанийн үнэлгээ нэмэгдсэн нь голлон нөлөөлсөн байна.
Жагсаалтын эхний таван байрт дараах бизнесменүүд бичигджээ:
- Алексей Мордашов (Северсталь) — 37 тэрбум ам.доллар
- Владимир Потанин (Норильский никель) — 29.7 тэрбум ам.доллар
- Вагит Алекперов (Лукойл) — 29.5 тэрбум ам.доллар
- Леонид Михельсон (Новатэк) — 28.3 тэрбум ам.доллар
- Сулейман Керимов — 25.7 тэрбум ам.доллар
Тэрбумтнуудын тоо ийнхүү өсөхөд ам.долларын ханш суларч, оросын рубль нэг жилийн дотор 16 хувиар чангарснаар хөрөнгийн үнэлгээ нь долларт шилжихэд илүү өндөр гарахад нөлөөлсөн байна. Хэрэв өнгөрсөн жил 80 тэрбум рублийн хөрөнгөтэй бизнесмен “Forbes”-ийн дэлхийн жагсаалтад ороход хангалтгүй байсан бол 2026 онд валютын ханшийн өөрчлөлтөөр тэдний хөрөнгө 1 тэрбум ам.долларыг давж, жагсаалтад орох боломж бүрджээ.
