УИХ-ын чуулганы өнөөдрийн (2026.06.12) нэгдсэн хуралдаанаар Замын хөдөлгөөний аюулгүй байдлын тухай хуулийн нэмэлт өөрчлөлтийн төслийг эцэслэн баталлаа. Уг хуулийг хоёр жилийн хугацаанд боловсруулсан бөгөөд ирэх долдугаар сарын 1-нээс эхлэн албан ёсоор улс даяар хэрэгжүүлж эхлэхийг УИХ-ын дарга С.Бямбацогт зарласан хууль санаачлагч, УИХ-ын гишүүн П.Батчимэг мэдээллээ. Шинэ зохицуулалтаар цахилгаан скүүтэр болон суррон (Surron) дугуйн замын хөдөлгөөнд оролцох дүрмийг маш тодорхой зааж өгсөн байна.
Мопедын ангилалд шилжиж, авто замын баруун хөвөөгөөр зорчино
Хууль боловсруулах шатандаа Казакстан, Сингапур, Англи, Өмнөд Солонгос болон Австрали зэрэг орнуудын туршлагыг судалж, Монгол Улсын нөхцөл байдалд тохируулан нутагшуулжээ. Сүүлийн үед скүүтэр, сурронтой холбоотой осол гэмтэл эрс нэмэгдсэн бөгөөд ГССҮТ-ийн өнгөрсөн долоо хоногийн мэдээллээр 221 иргэн энэ төрлийн тээврийн хэрэгслээс болж гэмтсэн байна. Энэхүү статистик нь уг хэрэгслүүдийг явган зорчигчийн замаар явуулж болохгүй гэдгийг баталж байгаа тул хуулиар дараах өөрчлөлтүүдийг оруулжээ.
- Тээврийн хэрэгслийн ангилал: Скүүтэр болон сурроныг “мопед”-ын ангилалд албан ёсоор оруулж байна.
- Зорчих чиглэл: Тэд зөвхөн зориулалтын дугуйн замаар зорчих үүрэгтэй. Хэрэв дугуйн зам байхгүй тохиолдолд авто замын зорчих эгнээний баруун хөвөөгөөр хөдөлгөөнд оролцоно.
- Насны хязгаар: Зөвхөн 18 насанд хүрсэн иргэд унаж замын хөдөлгөөнд оролцохыг зөвшөөрнө.
- Эцэг эхийн хариуцлага: Насны хязгаар хэтрүүлсэн буюу насанд хүрээгүй хүүхэд унаж замын хөдөлгөөнд оролцсон тохиолдолд Зөрчлийн тухай хуулиар хууль ёсны асран хамгаалагч, эцэг эхийг нь 200 мянган төгрөгөөр торгоно.
Дэд бүтцийн тулгамдсан асуудал ба хэрэгжилт
Уг хуулийн хэрэгжилтийг нийслэл хотод Улаанбаатар хотын Засаг дарга Б.Пүрэвдагва хариуцан ажиллах юм. Өнөөдрийн байдлаар нийслэл хотод стандартын шаардлага хангасан унадаг дугуйн зам хангалтгүй байгаа нь ирээдүйн хөгжлийг давхар тооцоолж ажиллаагүйн илрэл гэдгийг хууль санаачлагч хэлж байв. Иймд цаашид хууль санаачлагчдын зүгээс стандартад нийцсэн дугуйн замуудыг шинээр тавих төсвийг улсын төсөвт суулгах, дэд бүтцийг сайжруулах тал дээр онцгойлон анхаарч ажиллахаа мэдэгдлээ.
