Улаанбаатар хотын нийтийн тээврийн үйлчилгээнд “UB Card” нэртэй шинэ төлбөрийн систем энэ сарын 2-ноос нэвтэрч эхэлсэн билээ. Уг шинэчлэлтэй холбоотойгоор иргэдийн дунд зарим үл ойлголцол, техникийн саатал гарч байгаа тул Нийтийн тээврийн бодлогын газраас дараах тодруулгыг өгч байна.
Өмнөх системээс ялгаатай нь “UB Card” төхөөрөмж нь иргэдийн цаг завыг хэмнэх, төлбөрийн уян хатан нөхцөлийг санал болгож байгаа юм.
- Зөвхөн суухдаа уншуулна: Иргэд буухдаа картаа дахин уншуулах шаардлагагүй болсон.
- Төлбөрийн нөхцөл: Нэг удаа 1,000 төгрөг төлөөд тухайн өдөртөө 3 удаа дамжин суух (нийт 4 удаа зорчих) боломжтой.
- Аппликейшн ашиглах: Заавал биет карт гэлтгүй “UB Card” аппликейшнийг утсандаа суулган зорчих боломж нээгдсэн. Одоогоор 53,526 гаруй зорчигч аппликейшнийг тогтмол ашиглаж байна.
Түр зуурын саатал ба шалтгаан
Сүүлийн өдрүүдэд зарим “UMoney” карт ашигладаг иргэд дамжин суултын хөнгөлөлт эдлэх боломжгүй байгаа тухай гомдол гаргаж байна. Энэ нь дараах шалтгаантай аж: “Одоогоор шинэ систем болон хуучин системийн хооронд өгөгдөл шилжүүлэх, техникийн засвар шинэчлэлийн ажил хийгдэж байна. Үүнээс шалтгаалан зарим карт дээр дамжин суулт бүртгэгдэхгүй байх тохиолдол гарч байгаа бөгөөд систем удахгүй бүрэн хэвийн ажиллагаанд орно.”
Систем бүрэн зүгшрэх хүртэл иргэд та бүхэн “UB Card” аппликейшнийг ашиглах нь илүү найдвартай бөгөөд төлбөр тооцооны алдаа гарахаас сэргийлнэ. Хэрэв таны картаас илүү мөнгө суутгагдсан эсвэл дамжин суулт тооцогдоогүй бол систем хэвийн болсны дараа шалгуулах боломжтой юм.
