Rolls-Royce автомашинаас гадна гар урлалын ур чадвараа харуулах шинэ бүтээгдэхүүн танилцуулжээ. Өнгөрсөн жил 44 000 ам.долларын үнэтэй шатрын иж бүрдэл гаргасныхаа дараа Британийн брэнд энэ удаа өөрийн нард тоглоомын иж бүрдлийг бүтээсэн байна.
Rolls-Royce болон нард тоглоомын холбоо хүмүүсийн боддогоос ч урт түүхтэй аж. Нард тоглоом 5000 гаруй жилийн өмнө эртний Месопотамид үүссэн бол Rolls-Royce-ийн түүхэнд хамгийн багадаа 1938 оноос ул мөрөө үлдээжээ.
Тухайн үед захиалгаар бүтээсэн Wraith автомашины арын хэсэгт нард тоглох зориулалтын самбар суурилуулж байсан байна. Ийнхүү шинэ бүтээгдэхүүн нь компанийн өмнөх уламжлалтай тодорхой холбоотой болжээ.
Залуу хэрэглэгчдэд чиглэсэн шинэ иж бүрдэл
Уламжлалт байдлаар нард тоглоомыг ахимаг насны хүмүүс түлхүү сонирхдог. Харин Rolls-Royce-ийн хэрэглэгчдийн дундаж нас өмнөх 56-аас 43 болж буурсан тул шинэ иж бүрдэл нь эд зүйлийн зөвхөн хэрэглээг бус хийц, онцгой чанарыг үнэлдэг залуу худалдан авагчдад чиглэжээ.

Иж бүрдлийн үндэс нь Америк хушганы цул модоор хийсэн самбар бөгөөд Sunset, Sunrise өнгийн арьсан бүрээс, нарийн хийцтэй модон шигтгээ, хөнгөн цагаан нугастай. Нугасны хийц нь самбарыг нээх үйлдэлд хүртэл бага зэрэг ёслолын шинж нэмдэг байна.
Тоглоомын хүүг боксит нэмсэн нийлмэл материалаар хийжээ. Самбар дээр Rolls-Royce-ийн алдарт “Spirit of Ecstasy” дүрсийг мөн байрлуулсан бөгөөд самбар ямар байрлалтай байсан ч босоо хэвээр үлдэхээр зохион бүтээсэн байна.

Месопотамиас санаа авсан дизайн
Иж бүрдлийн дизайныг эртний Месопотамиас сэдэвлэжээ. Газрын өнгөтэй төстэй дулаан өнгөнүүд нь тоглоом үүссэн нутгийн байгалийн төрхийг санагдуулах зорилготой байна.
Шинэ нард тоглоомыг тэмцээний стандарт хэмжээтэй хувилбараар ч авах боломжтой. Rolls-Royce үнэ болон хувийн тохируулгын сонголтуудын талаар дэлгэрэнгүй мэдээлэл өгөөгүй байна.
Компанийн автомашинуудын нэгэн адил энэ бүтээгдэхүүний гол утга нь зөвхөн үндсэн зориулалтаараа хязгаарлагдахгүй гэж Rolls-Royce үзэж байна. Гар урлал, онцгой хийц, хувь хүнд тохируулан бүтээх зарчмыг гэрийн хэрэглээний бүтээгдэхүүнд шилжүүлсэн нь брэндийн туршлагын үргэлжлэл гэж тайлбарлажээ.

