Meta нийгмийн сүлжээнүүдийнхээ контент хяналтын үйл явцыг бараг бүрэн автоматжуулж, модераторуудын ажлыг хиймэл оюуны системүүдээр орлуулахаар зорьж байна. Financial Times-ийн мэдээлснээр, энэ алхам нь компанийн хиймэл оюунд оруулж буй их хэмжээний хөрөнгө оруулалтыг нөхөхөөс гадна жил бүр хэдэн тэрбум ам.долларын зардал хэмнэх боломжтой гэж тооцоолжээ.
Одоогоор хиймэл оюун контентын модерацитай холбоотой хүсэлтүүдийн ойролцоогоор талыг боловсруулж байна. Харин оны эцэс гэхэд зарим төрлийн зөрчил дээр энэ үзүүлэлт 90 хувиас давах боломжтой гэж үзэж байгаа аж. Өмнө нь маргаантай нийтлэл, хэрэглэгчдийн гомдол, давж заалдах хүсэлтийн ихэнхийг компанийн ажилтнууд гараар шалгадаг байв.
Meta-ийн тайлбарласнаар, хиймэл оюуны хэрэглээг өргөжүүлэх нь зөвхөн зардал бууруулах зорилготой биш. Компанийн дотоод туршилтаар хэлний загварууд дүрэм зөрчсөн контентыг илрүүлэхдээ өмнөх аргуудаас 13 хувиар бага алдаа гаргаж, зөрчлийг 10 орчим хувиар илүү илрүүлсэн байна.
Эрсдэл ба хэмнэлтийн тооцоо
Meta мөн програм хангамжийн хөгжүүлэлт болон хэрэглэгчийн дэмжлэгт генератив хиймэл оюуныг илүү өргөн ашиглаж эхэлжээ. Сүүлийн үеийн цомхотголуудын дараа компани өмнө нь ажилтнууд болон гаднын гэрээт гүйцэтгэгчид хийдэг байсан олон үйл явцыг автоматжуулж байна.
Тухайлбал, хэрэглэгчийн дэмжлэг болон модерацийн зарим ажлыг Google Gemini-д суурилсан шийдлээс өөрийн Muse Spark загвар руу шилжүүлж байгаа аж. Компанийн удирдлага орчин үеийн том хэлний загварууд мэдээллийн орчны өөрчлөлтөд хурдан дасан зохицож, олон хэл дээрх контенттой илүү үр дүнтэй ажиллаж, ажилтнуудыг сэтгэлзүйд хүнд нөлөөтэй материал үзэхээс хамгаална гэж үзэж байна.
Гэсэн ч компанийн дотор зарим мэргэжилтэн автомат системийн найдвартай байдал, алдааны түвшинд болгоомжтой хандаж байна. Учир нь хиймэл оюун одоо ч амьд модераторуудын гаргасан шийдвэр дээр тулгуурлан суралцдаг, ялангуяа давж заалдах хүсэлтийг үнэлэхэд хүний оролцоо чухал хэвээр байгаа юм.
Meta тусгайлан дараах чиглэлүүдэд хяналтаа чангатгаж байна.
- луйврын шинжтэй сурталчилгаа
- хориглосон барааны зар
- дүрэм зөрчсөн контент
- хэрэглэгчийн гомдол, давж заалдах хүсэлт
Ийм хяналт нь компанийн рекламын орлогод сөргөөр нөлөөлж болзошгүй. Шинжээчдийн үнэлгээгээр, 2024 онд ийм төрлийн зарууд Meta-ийн рекламын орлогын 10 орчим хувийг бүрдүүлсэн бөгөөд энэ нь ойролцоогоор 16 тэрбум ам.доллартай тэнцэж байжээ. Гэсэн ч компани хууль эрх зүйн эрсдэлийг бууруулах, хэрэглэгчдийн итгэлийг нэмэгдүүлэх замаар боломжит алдагдлыг нөхнө гэж тооцоолж байна.
