ОХУ-ын Казань хотын гимназид халдлага үйлдэж, олон хүний аминд хүрсэн Ильназ Галявиев “Хар дельфин” хорих ангид гэрлэсэн талаар Telegram-суваг Mash мэдээлжээ. Түүний эхнэр нь Москвагаас гаралтай, 18 настай шинэхэн сэтгүүлч Диана К. болсон байна.
Мэдээлэлд дурдсанаар, Диана К. Галявиевыг анх шүүх хурлын үеэр харжээ. Дараа нь түүнтэй уулзахаар хорих анги руу очсон бөгөөд үүний дараа хос гэрлэлтээ батлуулах шийдвэр гаргасан байна.
Гэрлэлтийг 5-р сарын сүүлээр Соль-Илецк дахь ИК-6 хорих ангид бүртгэжээ. Одоо тэд жилд ердөө нэг удаа уулзах боломжтой гэж мэдээлсэн байна.
Галявиев бүх насаараа хоригдох ял авсан
2021 оны 5-р сард Ильназ Галявиев Казань хотын №175 гимназид буу барин нэвтэрч, долоон хүүхэд болон хоёр багшийг хөнөөсөн. Мөн халдлагын үеэр 24 хүн шархадсан юм.
Шүүх түүнийг хэрэг үйлдэх үедээ сэтгэцийн хувьд хариуцлага хүлээх чадвартай байсан гэж үзэж, бүх насаар нь хорих ял оноосон байна.
Халдлагын дараа Галявиевын эргэн тойронд түүнийг дэмжигч хэсэг хүмүүс бий болсон гэж мэдээлэгдэж байв. Зарим эмэгтэйчүүд түүнд өмгөөлөгчийн зардалд зориулан мөнгө цуглуулж байсан талаар мөн дурджээ.
