Японы армийн тагнуулын нэг нэгж тус улсын иргэдийн тухай хувийн мэдээллийг албан бусаар цуглуулж, үүнд тэдний “үзэл суртлын чиг баримжаа” болон “бэлгийн сонирхол” зэрэг мэдээллийг багтаан тогтмол тайлан бэлтгэдэг байсан гэж Kyodo агентлагийн мөрдөн сурвалжилгад дурджээ. Мэдээллийг агент элсүүлэх зорилгоор ч ашигладаг байсан гэж тус агентлаг мэдээлсэн байна.
Хууль зөрчсөн байж болзошгүй гэж үзжээ
Kyodo-гийн үзэж буйгаар, ийм үйл ажиллагаа нь хаалттай аргаар хувийн мэдээлэл цуглуулахыг хориглосон хууль тогтоомжийг зөрчсөн байж болзошгүй аж. Японы Батлан хамгаалахын сайд Шинжиро Коизүми өмнө нь ийм төрлийн тайлан байдаг гэдгийг хүлээн зөвшөөрөөгүй гэж агентлаг тэмдэглэжээ.
Гэсэн ч тус нэгжийн хуучин ажилтнуудын өгсөн мэдээлэлд үндэслэн Kyodo нэгж дотор Ази, Африкийн зарим улс орон зэрэг тодорхой бүс нутгийг тусгайлан хариуцсан ажилтнууд байсан гэж тогтоосон байна. Тэд Японд амьдардаг тухайн бүс нутгийн гаралтай хүмүүс болон Японы мэргэжилтнүүдтэй албан бусаар холбоо тогтоодог байжээ.
41 төрлийн мэдээлэл бүртгэдэг байсан гэж мэдээлэв
Kyodo-гийн мэдээлснээр, тайлангуудад тухайн хүмүүсийн талаар 41 төрлийн мэдээлэл оруулдаг байжээ. Үүнд гадаад төрхийн шинж тэмдэг, хаяг, утасны дугаар төдийгүй улс төр, шашны үзэл бодол, хувийн амьдрал, санхүүгийн байдал зэрэг мэдээлэл багтдаг байсан байна.
Мөн нэгжийн ажилтнууд сонирхож буй хүмүүстэй хэрхэн холбоо тогтоох, ямар шалтгаан хэлж танилцах зэргийг урьдчилан төлөвлөж, удирдлагаар батлуулдаг байжээ.
Kyodo-гийн мэдээлснээр, ийм төрлийн материалуудыг албан ёсны тайлангийн бүртгэлд оруулдаггүй байсан аж.
